Bambambe inkunzi emini kwa-bha uSerena
ABELUNGU kabaphatheki kahle neze uma bebona umuntu ompisholo ephumelela. Bafana nalezi zingane ezazizonda lezi ezaziphasa ngamalengiso esikoleni.
Phela le nto eyenzeke kumdlali wodumo webhola lomphebezo waseMelika, uSerena Williams, iyafana nje nalena eyayenziwa yizidomu ezazizenza amabhoklolo.
Inhlangano yebhola lomphebezo jikelele imhlawulise u-R300 000 uSerena ngoba kuthiwa ukhulume kabi nonompempe ngesikhathi ebhaxabulwa yintombazanyana yaseJapan, uNaomi Osaka, emdlalweni wamanqamu we-US Open.
Bambambe inkunzi emini kwabha, kubheke wonke umuntu!
Unompempe uqale ngokumthathela amaphoyinti ethi umqeqeshi wakhe uyamqeqesha ebe edlala, lokho okungavunyelwe ebholeni lomphebezo.
Uthe ethi uyachaza ukuthi yena ubengathathi zeluleko kumqeqeshi wakhe, unompempe wamtshela ukuthi makadle ushathaphu, wamxwayisa ngokuthi angalokhu emphendula ngoba uyonyelwa yinja endlini.
USerena uthe esadlala, yathatha iphoyinti le ngane yakwa-Osaka. Uthe ngokucasuka, walahla phansi impebezi lena aphebeza ngayo ibhola, yaphuka.
Unompempe uphinde wamthathela iphoyinti wathi uhlukumeza ithuluzi lomdlalo; phecelezi abusing an equipment.
Lapho ngihleke ngalala ngesisu ngoba phela le mpebezi ngeyakhe uSerena, unompempe yena ungenaphi?
Okuxakayo wukuthi umqeqeshi kaSerena uthi ubezama ukumnikeza amathiphu, ekhuluma ngezandla, kodwa akacabangi ukuthi lo mdlali uke wambheka nokumbheka nje.
Usho nokuthi naye lona waseJapan ubeqeqeshwa ngumqeqeshi wakhe ngesikhathi edlala, kusukela uqala umdlalo waze wayophela. Kudala bamqala ukumhlukumeza uSerena laba bantu bale nhlangano yebhola lomphebezo.
Baqala ngokumkhumulisa izigqebhezana lezi abedlala ngazo, mhlawumbe ngoba zazinyusela onompempe nababukeli ngoshukela nehayihayi, nakho konke nje okubheka phezulu.
Phela imile bo le ntokazi, futhi iphiwe. Uzwa kukhala izinsizwa namakhehla kanti ngisho nezimbamgodi zasemakhaya uzithola sezibukele, zibubula sengathi ziphethwe yisibhobo, yize zingazi nokuthi kuwinwa uma sekutheni.
Kusho ukuthi kudala abelungu bezama amaqhinga okumkhipha uSerena ngoba phela uwina njalo nje sengathi udlala yedwa. Nomdlali wegalofu wodumo, uTiger Woods, bamenzenjalo.
Phela kwakungekho mlungu owayemehlula kulo mdlalo, wayezitamuzela nje, etapa yonke imiklomelo ekhona eyayihambisana nezindodla zemali. Bathe besuka benza omkhulu umsindo lona ngokuthi uyisoka lamanyala ebe eshade umlungu. Nezinkampani ezazimxhasile zamemuka imali yemixhaso leyo.
Umfazi naye waya enkantolo wayocela isahlukaniso. Kwaba wukuphasha kwakhe-ke umfo kaWoods nomdlalo wakhe wehla kakhulu ngezinga.
Umsubathi wethu we-800m, uCaster Semenya, naye bazama ukumkhipha ngoba nakhu bengakwazi ukumshiya ngejubane.
Sebethi makadle amaphilisi azomkhinda amandla, amenze ntekenteke uma efuna ukuqhubeka nomdlalo wokusubatha. Leyo mpi okaSemenya usayilwa kunamanje.
Sekuyacaca ukuthi o ntaba kayikho n j wala baba khomba indlela babuye bajike ngoba phela bathi izidakamizwa mazingadliwa emidlalweni, ngonjani lo onikwa igunya kuthiwe makazidle?
Yingoba nakhu kufanele aphenduke ulamthuthu kodwa ugijima nemileqwa - inkukhu yasekhaya - eyazibonelwa ngamaXhosa?
Wayesho lokhu-ke umholi weBlack Consciousness Movement, uSteve Bantu Biko, uma ethi: “Umi wedwa wemntomnyama”.
Akekho umuntu ongakwephuca isiphiwo sakho, okusho ukuthi abelungu bayohlala benyukelwa wushukela nje ngoba uma umuntu omnyama eyazi into, ugila isampuli, akhiphe amangwevu, akhiphe ubhozo! Nasebholeni kabafuni sibajike, bathi siyabadelela, onompempe basinike amakhadi.
Kungani bona bangafundi ukujika, yini bafune thina sizehlise sibe sezingeni labo? Wukukhohlakala nje lokho. USerena kumele abuye ababhaxule uma umzimba usavuma. Phela neminyaka isihambile, ngeke abe musha ingunaphakade.
Cha, nami ngiyavuma ukuthi bamrobhe emini kwa-bha, ilanga likhipha uSathane esihogweni!