Isizwe esigcina amasiko aso siyanotha ngemvelaphi yaso
KUBUKEKA kukuningi ukudideka esinakho ngamasiko thina abansundu. Ama-Afrika amaningi anayo le ndawana yokucwasa amasiko abafowabo bakuleli lizwekazi, awabukela phansi ngendlela eyisimanga.
Abantu bayakhohlwa ukuthi isizwe nesizwe sikhuluma ulimi lwaso, sinomndeni onesibongo sawo esehlukile kwesinye futhi leso naleso sibongo sinalokho okukhethekile okwenziwayo ngokwaso njengokugcaba ebusweni, ukubikwa kwengane ezelwe esibayeni nokunye okwehlukile kwesinye isibongo.
Izibongo nje zizodwa zenza umndeni nomndeni wehluke komunye nemikhuba yayo futhi yehluke. Lokhu kwehluka kuyafana futhi nokwezilimi ngoba abantu abakhuluma ulimi oluthile - olwehlukile kwezinye izilimi - banendlela abenza ngayo izinto.
Yingakho uma umuntu ekhuluma ulimi okungelona olwakho, umane umuzwe ukuthi wehlukile kuwena noma kwabanye. Lokhu kwehluka kumenza abe ngokhethekile.
Ngisho izindlela esikhombisa ngazo inhlonipho nesikompilo, ikhombisa ukwehluka, okusenza sinothe ngokwehluka esiyikhona. Lo mnotho wamasiko ethu ngokwahlukana kwawo, yiwona okumele siwuqhakambise futhi siziqhenye ngawo, senze nezinye izizwe zisazi futhi zisihloniphe ngoba zibona sizigqaja ngobuthi- na.
Ukuzigqaja nokuhlonipha amasiko ethu yikhona okuzokhumbuza izingane zethu nezizuku- lwane eziselamayo ukuthi kubaluleke kangakanani ukugcina okungokwethu kunokugxumela okwezizwe - esingenalo ulwazi oluphelele ngakho. Isizwe esigcina awaso amasiko siyanotha ngemvelaphi yaso, okuba nomthelela wokukhula kwaso.
Bengingafisa ukubona intsha yethu - ngokwezizwe zayo zendabuko - izihlupha ngokucwaninga ngemvelaphi yezizwe zayo, isebenzisa ulwazi nemfundo yayo ukuze isuse lesi sithombe sokuthi ogcina amasiko esintu unobuqaba nokuba semuva nempilo. Sekuyisikhathi sokuqonda ukuthi akudingeki sixolise kumuntu ngesiyikho, kunalokho kumele siphumele obala siziqhenye ngakho. sikhombise nezinye izi- zwe ukuthi ukuceba ngokwesiko kukunothisa kanjani njengomuntu uwedwa, njengelungu lomndeni nelesibongo esithile nanjengesizwe osimele ungumuntu.
Kuyinselelo kubelaphi bendabuko ukuthi njengoba bona bekhanyiselekile ngokubaluleka kokugcinwa kwemikhuba namasiko aleyo naleyo mizi, yileso naleso sizwe, baphumele obala bafundise ngalokubaluleka kokwazisa okwethu kwesintu namasiko. mthiyanesgs@yahoo.com Utholakala ku: 082 752 7342