ISIKHULU SE-PMB UNITED NOMLAYEZO ONZIMA
USIHLALO weMaritzburg United uFarook “Ntshebe” Kadodia uthumele umlayezo onzima kubadlali bakhe ngaphambi komdlalo omqoka wale kilabhu.
IMaritzburg izobhekana neBidvest Wits kowe-Absa Premiership ngoMgqibelo ngo-18h00 eHarry Gwala Stadium, eMgungundlovu.
Lo mdlalo ubhekwe ngabomvu njengoba iWits iqhwakele esicongweni, kanti iMaritzburg yona iphansi emsileni.
UKadodia uthi abadlali bakhe kuzofanele bashintshe ukwenza kulo mdlalo.
“Indawo esihleli kuyona ayiyinhle neze, inzima injalo nje iyasabeka.
"Ngifuna abadlali bami bazi ukuthi kufanele basuke kule ndawo kusemanje ngoba sike saphunyuka kanzima kumasizini ambalwa edlule.
"Angifuni kusiphinde lokho ngakho-ke kufanele siwunqobe lo mdlalo kumnyama kubomvu.
"Kulo mdlalo ngidinga iwini kubona hhayi okungaphansi kwalokho,” kusho uKadodia.
UGavin Hunt ocija iWits uthi umdlalo weMaritzburg uzoba nzima njengoba ifuna ukusuka kule ndawo embi ekuyona.
Uthi inzima ekhaya kodwa bazozama ngawo wonke amandla ukuyishayela esibayeni sayo.
Emdlalweni wayo wokugcina iWits ibhaxabule AmaZulu FC ngo-3-0 eBidvest Stadium.
Amagoli eWits kulo mdlalo abhakuziswe enethini..
Ngakolunye uhlangothi iMa-ritzburg yona igcine ukudlala ibambana ngo-00 neKaizer Chiefs eHarry Gwala Stadium kanti phakathi kwabadlali okulindeleke igadle ngabo kubalwa noMxolisi Kunene ( osesithombeni).