Izonyomfa umgqigqo wezitha i-Eagles
Usephinde waqashwa umqeqeshi oxoshwe ngele-PSL
BAHLELA ukunyomfa umcimbi wezitha abeRoyal Eagles ezovovana inkani neTshakhuma Tsha Madzivhandila kokaNational First Division (NFD) ngoMgqibelo ngo-15h00, eChatsworth Stadium.
ILANGA lixoxa noJames “Matatazela” Dlamini oyimenenja jikelele ye-Eagles izolo ngoLwesithathu, uthe sebejahe kabi kufike usuku lo mdlalo.
Uthi bazimisele ngokunyomfa umgqigqo omuhle wezitha. Uthi kuyimpoqo kubadlali ukunqoba lo mdlalo njengoba bekwazile ukubuya nephuzu elimqoka ekuhambeni bedlala ngokulingana ngo-1-1 neRichards Bay.
“Libe mqoka kakhulu leli phuzu esilithole ngeledlule kwiBay. Abadlali bawulindele kabi lo mdlalo. Okuhle wukuthi amaphepha kaLuis Miquissone, obemele izwe lakhe eMozambique, aseqondile. ITTM idlala ibhola elihle futhi ihlale isinika ubunzima ngaso sonke isikhathi uma sibhekene nayo. Okubalulekile wukuqedela amathuba esiwatholayo,” kusho uDlamini.
Ube esegqugquzela abalandeli ukuba baphume ngezinkani ukuzobuka lo mdlalo kwazise kungenwa mahhala.
I-Eagles ibeke amathemba ayo kuLesvin Stoffels, uMuzi Thabotha osanda kubingelela abalandeli ngokubhakuzisa inethi nonozinti uDumisani Msibi ( osesithombeni) kanti neTshakuma ibheke uDavid Zulu, uSiyabulela Shai no-Edward Manqele.
Kuzo ezeNFD, iWitbank Spurs ithuse abalandeli abaningi bebhola ngesikhathi ibuyisa uVusi Mkhatshwa osanda kuxoshwa yiTS Galaxy. UMkhatshwa uzokuba yiphini likamqeqeshi uRahman Gumbo oqhoqhobele izintambo kule kilabhu.
Isiyonke imidlalo yeNFD ngempelasonto imi kanje:NGOMGQIBELO Kabokweni: TS Sporting vs Ajax Cape Town 15h00.
EChatsworth: Royal Eagles vs Tshakhuma Tsha Madzivhandila 15h00. NGESONTO EKameelrivier: TS Galaxy vs UBuntu Cape Town 15h00.
E-Idas Valley Sports: Stellenbosch FC vs Mbombela United 15h00.
EPuma: Witbank Spurs vs Pretoria University FC 15h00.
EVolkswagen Dobsonville: Maccabi FC vs Jomo Cosmos 15h00. NGOMSOMBULUKO ECape Town: Cape Umoya United vs Richards Bay 15h00.