Ezimnandi kwabeChiefs ngabadlali
Umqeqeshi uthembisa izinguquko ezinkulu
EZIMNANDI kubalandeli beKaizer Chiefs ngabadlali bayo abasanda kusayiniswa. IChiefs izobhekana neCape Town City kowe-Absa Premiership ngoMgqibelo ngo-15h00 eCape Town Stadium.
IziMpofana ziya kulo mdlalo nje zisanda kujeziswa kanzima ngesehlakalo sokungaziphathi kahle kwabalandeli bazo esenzeke ngesizini eyedlule eMoses Mabhida Stadium, eThekwini.
NgoLwesibili ikomidi lePremier Soccer League (PSL) eliqondisa izigwegwe lithole iChiefs inecala, layigweba imidlalo emibili ezoyidlala ibukwa yizihlalo, yabe isilengiselwa owodwa izinyanga ezingu-24.
IChiefs iyalidlulisa icala. Izikhulu zeChiefs zizohlangana namuhla ngoLwesine ukuhlahla indlela ebheke phambili ngalesi sinqumo. Lo mhlangano uzohanjelwa nanguKaizer Motaung onguSihlalo wekilabhu. Kuzobhungwa kakhulu ngomdlalo iChiefs okumele iwudlale nePolokwane City mhla ka-6 kuMfumfu (October) eMabhida.
Ezingase zibe mnandi kubalandeli beChiefs ngezithi uLebohang Manyama odlala esiswini osanda kusayiniswa yile kilabhu usekulungele ukudlala.
NoMario Booysen odlala emuva okuthiwa ufike enokuthinteka usengumqemane. U-Andriamirado "Dax" Andrianarimanana osanda kusayiniswa yiChiefs naye kulindeleke abonakale kulo mdlalo njengoba iFifa isimkhululile.
UGiovanni Solinas ololonga iChiefs uthi ziyamjabulisa izindaba zakamuva eqenjini lakhe.
“UManyama ufike kubonakala ukuthi usenesikhathi engadlali futhi akekho qatha ngokwanele.
"Manje ubukhali ngendlela eyisimanga, kungenzeka abonakale kulo mdlalo.
"NoBooysen ngokunjalo usesimweni esihle manje, naye kungenzeka abonakale. Konke kuzoncika ekutheni siqoka liphi iqembu esiya nalo kulo mdlalo.
"Leli khefu lisisize ngendlela eyisimanga ngoba sikwazile ukulungisa lapho bekuxega khona.
"Umdlalo wethu neCape Town City uzoba sezingeni eliphezulu. Ngikholwa wukuthi yiwona esizophendula ngawo amatafula,” kusho uSolinas.
UBenni McCarthy ololonga iCity uthi unovalo ngabadlali bakhe.
UMcCarthy ngalo mdlalo uzobe ehlanganisa engu-50 engumlolongi weCity.
“Nginovalo ngabadlali bami. Ibhola ngilidlalile, ngiyazi ukuthi iba njani imidlalo oyigijima usasalelwe ngowamanqamu.
"Noma kanjani imiqondo yabo isikulo wamanqamu esizowudlala neSuperSport, akekho nje ozofuna ukuzinikela kulo mdlalo bazobe besaba ukulimala. Leyo yinto ongeke uyibalekele.
"Kodwa-ke kuzofanele ngiyisebenze imiqondo yabo ngoba amaphuzu siyawadinga,” kusho uMcCarthy.