USEFUNA UKUSHIYA I-PIRATES
UFUNA ukuhamba kwi-Orlando Pirates unozinti wayo osedlaliswa ezinganeni ngenxa yokumiswa kabi ngozakwabo.
IBucs izobhekana neSuperSport United kowe-Absa Premiership ngoMgqibelo ngo-20h15 e-Orlando Stadium, eSoweto.
Leli phephandaba lihoshe ngemithombo yalo esondelene noJackson Mabokgwane ukuthi lo mdlali uhlela ukufaka isicelo sokuba le kilabhu imudedele uma sekuvulwe iwindi lokudayiselana ngabadlali kwazise uyabona ukuthi ngeke alithole ijezi.
Kuthiwa into emcika kakhulu wukudlaliswa nezingane eqenjini leBucs leMulti Choice ekubeni kunamakilabhu amfunayo kwiPremiership.
Kuvela ukuthi ufuna ukuhamba nje iHighlands Park engomakoti beligi iyamfuna.
Umthombo waleli phephandaba osondelene noMabokgwane uthe:
“Ubedinwe eqhuma uMabokgwane emuva kokuba izingane zaMaZulu zimubhuquzisile kwiMulti Choice ngeledlule.
Ukhale ngokuthi le nto imehlisa isithunzi ekubeni kunamakilabhu amhloniphayo kwiPremiership futhi amfunayo.
Akeneme ngokuba kwiPirates ngoba selokhu efikile izinga lakhe lishona phansi, useze walahlekelwa nayindawo eqenjini lesizwe iBafana Bafana.
"Uma kuvulwa iwindi lokudayiselana ngabadlali ufuna ukufaka isicelo sokuhamba usenele wukukhuhla ibhentshi,” kusho lo mthombo.
UMilutin “Micho” Sredojevic ololonga iBucs uthi ngeke akwazi ukukhuluma ngabadlali yena into emqoka njengamanje wukuthi ikilabhu yakhe iqale iqoqe amaphuzu.
“Into emqoka wukuthi siqale sinqobe imidlalo yethu manje iyona into esemqondweni wami leyo. "Sibhekene neSuperSport esikhiphe emqhudelwaneni weMTN8 silindele umdlalo onzima kuyona.
"Kodwa-ke okwenzeke kulo mqhudelwano sesidlulile kukhona njengamanje kufanele sibuyise isithunzi sethu ngokuthi siqale sinqobe imidlalo,” kusho uSredojevic.
UKaitano Tembo ololonga iSuperSport uthi balindele umdlalo onzima kwiPirates.
“Ngokwami abanayo ingcindezi yokuthi sibakhiphe kwiMTN8 abantu abanengcindezi yithina.
Bazoba yingozi njengoba imiphumela ibingabavumi.
Kodwa-ke sinalo isu lokubabamba ngeke sibuye silambatha kulo mdlalo,” kusho uTembo.