Kuqothwe umndeni usolwa ngokuthakatha
Indodana isindiswe ukucisha ugesi
KUCISHE kwavalwa ngehlahla emndenini wakwaMkhize eNgodini, eMtshezi, ngoMgqibelo ebusuku, kugasela abantu bahlwayela ngenhlamvu kwashona amalungu awo amathathu, elinye laphuthunyiswa esibhedlela kukubi - ngoba kusolwa ikhehla lakhona ngokuthakatha.
Ngokuthola kweLANGA - eliziyele mathupha kwaMkhize ngoLwesibili - kubulawe uMnu Mxosheni Mkhize (73), yizingane ezimbili, uNsizwa Mpembe (3) ofunda enkulisa, noLondeka Mkhize (15) ofunda uGrade 6, kanti uNkk Khonzaphi Mkhize yena usindile.
Kubikwa ukuthi mhla ka-1 kule nyanga kushone insizwa yakwamakhelwane wakwaMkhize ebiphethwe yizinyawo, igulela eGoli. Kuthe uma uMnu Mkhize eyokhalisana nomakhelwane wakhe - abahlukaniswe wucingo naye - waxoshwa kwathiwa ungumthakathi.
UMnu Mkhize kuthiwa ubikele ngisho induna yendawo ngokuxoshwa kwakhe kwamakhelwane, ngisho emngcwabeni akalubhadanga ngoba esesaba ukuthi hleze enzakaliswe.
Kubikwa ukuthi ngo19h00 ngoMgqibelo kugasele izinsizwa ezimbili kwaMkhize, zangena endlini obekuhleli kuyona uMnu Mkhize noLondeka, zavulela ngenhlamvu.
Elandisa leli phephandaba uMnu Vumani Mkhize, oyilungu lomndeni, uthi yena usinde ngoba ubesaphumile esesitolo ngesikhathi kugasela izelelesi, ufike selidume ladlula.
“Babulale ubaba nengane ababafice bebuka umabonakude. Ngaleso sikhathi umama ubekwenye indlu eseceleni kwathi uma ezwa kuqhuma isibhamu, wavula isivalo elunguza, bambona baqonda ngqo kuyena wavele wazivalela ngaphakathi endlini nezingane ezincane ezintathu wakhiya.
“Uma sebebona ukuthi usekhiyile, bavele bahlwayela ngenhlamvu bedubula isivalo ngeshwa-ke yangena ekhanda inhlamvu enganeni, kodwa umama yena washayeka emathangeni.
“Kuyacaca ukuthi bebezobulala bonke abantu lapha ekhaya,” kusho uMnu Vumani.
Uthi kayikho ingxabano abayaziyo bewumndeni futhi abakaze besatshiswe ngokusocongwa.
Indodana yakhona yokugcina efunda uGrade-12 eHlabane High School, uSpheni Mkhize - ebikhona kuhlaselwa kubo - itshele ILANGA ukuthi ngesikhathi kuqhuma isibhamu ivele yacisha ugesi ngoba bekwenzeka konke lokhu iselawini layo, isisaba ukuthi bazoya bayobheka ukuthi kukhona bani.
Induna yendawo, uMnu France Mthembu, ikuqinisekisile ukuthi uMnu Mkhize ubeyibikele ngokuxoshwa kwamakhelwane kufiwe, wasolwa ngokuphehla amanzi amnyama okuholele ekufeni kwendodana yakhona.
“Sezijwayelekile izigameko ezifana nalesi kule ndawo ngoba nangoZibandlela (December) kubhokodwe omunye umama ngomkhonto esolwa ngakho ukuthakatha.
“UMkhize akaze abanjwe emzini womuntu ngoba kasikaze sibikelwe lutho ngaye ukuthi nangu-ke ubanjiwe. Mina ngisola umona nje wabantu bakithi wokuthi uma umuntu esesele yedwa endaweni emdala, bese kuthiwa yena usele kanjani ekubeni bengasekho ontangayakhe, okusho ukuthi uyathakatha.
“Ngingowokuqala ngqa ofike lapha ekhaya ekuseni emuva kwesigameko, kuvulwe zonke izindlu, akukho ngisho imfene engiyibonile. Ibuhlungu kabi le nto yezangoma ezihlola izinto ezingekho,” kusho uMnu Mthembu.
Ngokuthola kweLANGA kuthiwa aseqalile amaphoyisa aphenya lo mndeni wakwamakhelwane osolwayo kulesi sigameko.
Amagobolondo ezinhlamvu atholakale egcekeni kubikwa ukuthi awu-25.
Okhulumela amaphoyisa kwaZulu-Natal, uColonel Thembeka Mbhele, usiqinisekisile isigameko sokubulawa kwamalungu akwaMkhize, wathi icala livulwe esiteshini samaphoyisa Amangwe.
Uthe okwamanje bekungakaboshwa muntu.