KAWENEME UMNDENI KASINDISO MAGAQA
Bathi kuningi okubadidayo kanti namaphoyisa ashaya ngolonwabu
KAWUSETHEMBI lutho ngophenyo olumayelana nokufa kukaMnu Sindiso Magaqa, oke waba ngunobhala-jikelele we-African National Congress Youth League (ANCYL) - umndeni wakhe yize ududuzeka ngezindaba zokuboshwa komuntu osolwayo ngokufa kwalo mholi oshone eseyikhansela kuMasipala waseMzimkhulu. Lokhu kuvezwe nguMnu Lwazi Magaqa ongumfowabo kamufi engxoxweni ekhethekile neLANGA emuva kwezindaba zokuboshwa komuntu mumbe (ongadalulwanga), obevele eNkantolo yeMantshi yaseMzimkhulu ngoLwesine olwedlule mayelana nokubulawa kukaMnu Magaqa.
UMnu Magaqa uhlaselwe ngoNtulikazi (July) 2017 e-Ibisi, eMzimkhulu, ehleli emotweni noNkk Jabu Mzizi noNkk Nonsikelelo Mafa abebengozakwabo. UNkk Mzizi noNkk Mafa nabo balimale kanzima kulokhu kuhlaselwa. UMnu Magaqa ugcine eshonele esibhedlela e-Inkosi Albert Luthuli ngoMandulo (September).
Ekhuluma neLANGA uMnu Magaqa, uthe okwenza bangasathembi lutho - ngisho nangalokhu kokuboshwa komsolwa - wukuthi kunezinto ezabadida umqondo njengoba sekuke kwavela ukuthi abasolwa ngokubulala umfowabo badutshulwe ngamaphoyisa ngesikhathi bezama ukuphanga imoto yemali emgwaqweni ophakathi kweKokstad neHarding. “Bazi kanjani ukuthi labo abadutshulwa kuleso sehlakalo yibona ababulale umfowethu?” kusho uMnu Magaqa.
Uthe okunye okubaxaka kakhulu wukuthi amaphoyisa ashaya ngolonwabu ekubopheni abathinteka ezigamekweni zokubulawa kosopolitiki kodwa uma kubulawa abantu nje, abopha ngokushesha.
“Yingakho singafuni ukushesha sijabule ngoba kungakhulunywa okunye kusasa. Izinhliziyo zethu ziyokhululeka uma sebejezisiwe labo ababulale umfowethu,” kusho uMnu Magaqa. Nokho uthe lokhu kakusho ukuthi kabawuncomi umsebenzi wamaphoyisa, ikakhulukazi ithimba likaNgqongqoshe wezamaPhoyisa, uMnu Bheki Cele, okubikwa ukuthi selibophe abasolwa abawu28 ezinyangeni nje ezimbili mayelana namacala okubulawa kosopolitiki KwaZulu Natali.
“Siwumndeni siyokhululeka kakhulu uma sebejezile abasolwa futhi bachaza ukuthi bambulalelani umfowethu, bethunywe ngubani,” kusho uMnu Magaqa.
Uthe asabhibha amanxeba emndenini wakhe ngokubulawa komfowabo njengoba amanye amalungu awo engasabuki ngisho umabonakude uma kukhulunywa ngokubulawa kosopolitiki ngoba azi kahle ukuthi kuzovezwa izithombe zomfowabo. Okhulumela i-African National Congress (ANC) esifundeni iHarry Gwala, uMnu Thabiso Zulu, uthe bakuthakasela kakhulu ukuthi ekugcineni kuze kwabakhona oboshwayo ngesigameko sokuhlaselwa kukaMnu Magaqa.
Okhulumela uNgqongqoshe wamaPhoyisa, uNkz Reneilwe Serero, wale waphetha ukudalula imininingwane mayelana nomsolwa wathi: “Ungqongqoshe ukubeke kwacaca esigcawini sabezindaba ukuthi ngeke sidalule lutho ngomsolwa ngoba sibalekela ukuthi kuphazamiseke uphenyo.” ILANGA lithole ukuthi ithimba likangqongqoshe lisezithendeni zabanye abasolwa ababili, okulindeleke ukuba babo
shwe kuleli sonto.
Bazi kanjani ukuthi labo abadutshuliwe kule sehlakalo yibona ababulale umfowethu. Yingakho singafuni ukushesha sijabule ngoba kungakhulunywa
okunye kusasa. Izinhliziyo zethu ziyokhululeka uma sebejezisiwe...
YIZE uphelelwe yithemba ngophenyo umndeni kaMnu Sindiso Magaqa kodwa uyalincoma ithimba likaNgqongqoshe wezamaPhoyisa, uMnu Bheki Cele.