BABHEME BAKHOLWA KOWOSUTHU NE-DOWNS
Ukhale ngokuxhakathiswa okwesigebengu komlandeli weDowns
UCISHE washova iqupha nesikhulu sonogada uPitso “Jingles” Mosimane ongumqeqeshi weMamelodi Sundowns, ebambane namaZulu FC ngo-3-3 kowe-Absa Premiership, izolo ngeSonto ntambama eKing Zwelithini Stadium, eMlazi.
Emuva kokuphela kwalo mdlalo obusezingeni eliphezulu, uMosimane ulanyulwe ngamaphoyisa esho ukuqeda umphathi wonogada obekhipha abalandeli abathathu beDowns abajombe uthango beyodansa nabadlali.
Lesi sigameko siphoxe ibhola elihle elidlalwe yila makilabhu njengoba eshiye abalandeli bawo bebheme bakholwa.
Amagoli oSuthu abhakuziswe nguButholezwe Ncube, uJabulani Ncobeni noBongi Ntuli. AweDowns ashaywe nguPhakamani Mahlambi, uToni Silva noSibusiso “Villa” Vilakazi. UMosimane emuva komdlalo uzivikele ngokuthi ubemsiza umlandeli wakhe ukuze angaxhakathiswa okwesigebengu. Uthe ubengaqali ukukwenza lokhu njengoba ehlala ebasiza. Uncome umqeqeshi wamaZulu, uCavin Johnson, ngebhola elikhonjiswe ngezakhe.
Uthe badlala ibhola elihlukile kunesizini edlule, baliqala emuva okuyinto encomekayo. Uphikile ukuthi ubambene ngezihluthu nobhekelela ezokuphepha oSuthwini
Uphinde washayela ihlombe uVictor Gomes, wathi uwuphathe ngobunono umdlalo.
Uthe iphenathi abacabangi ukuthi ubancishe yona, bekungesiyo, wenze isinqumo esiphusile. UJohnson uthe ezakhe zizenzele zona phansi.
“Lo mdlalo bekufanele siwunqobe, iSundowns besiyibambile savele sayipha igoli umdlalo usuzophela. Lingiphathe kabi leli goli ngoba bese ngibalile kodwa-ke akusenani ngoba abalandeli sibanike umdlalo oseqophelweni eliphezulu,” kusho uJohnson.
Khonamanjalo, kuvela ukuthi kulo mdlalo kubanjwe abantu abathathu abebedayisa amathikithi omkokotelo nemali elinganiselwa ku-R6 000
Ekhasini le-Twitter loSuthu, kufakwe izithombe zabalisa ababanjwe oqotsheni begila lo mkhuba besaphethe amathikithi angu-300 ongombombayi.