Kuphume isidumbu kubangwa i- charger
Ugwazwe ngumuntu abehleli naye
KUPHUME isidumbu ngoMgqibelo ebusuku ngenxa yengxabano edalwe yicharger phakathi kwabesilisa abahlala efulethini iMadiba House, eThekwini.
Kuthiwa umsolwa nesisulu bebehleli ndawonye kwelinye lamagumbi kuxoxwa. Kubikwa ukuthi uSamkelo Caluza (19) (osesithombeni) waseDosumlenzana, eMzimkhulu ubehleli nomsolwa - ILANGA elinalo igama lakhe - waseGamalakhe, ePort Shepstone, kuxoxwa kanti umakhalekhukhwini womunye wabo uzophelelwa wumlilo, kwasuka umsindo-ke kubangwa i- charger.
USamkelo ubehlala kule ndlu ngoba elungisa umatikuletsheni wakhe kanti umsolwa ubesebenza kwesinye isitolo esidayisa ukudla ngaseDurban Station.
ILANGA lizifikele mathupha egunjini okwenzeke kulo lesi sigameko lafica umatilasi umufi aphangalale kuwo usagcwele igazi.
Umnikazi wendlu, uMnu uMthokozisi Ngcobo (39), utshele ILANGA ukuthi namanje usashaqekile ngalesi sigameko.
“Bengikhona endlini kodwa bengikwelami igumbi ngibukela ibhola. Ngizwe umsindo ngaphuma egunjini lami, ngihlangane noSamkelo ebambe entanyeni evuza igazi, wathi mangimsize sebe- mgwazile. Ngishaqekile ngathatha isikibha sami ngizama ukumvala inxeba ebeliphuma kakhulu igazi.
"Ngihambe ngayobheka ukuthi ngubani owenze lokhu. U… (egagula umsolwa) ngifike engasekho, ngabuyela egunjini ngiyozama ukutholela uSamkelo usizo, ngamfica eselele engasaphefumuli,” kusho uMnu Ngcobo.
Umzala kamufi othe unguSanele Vundisa (19), uthe namanje usadidekile ngento eyehlele umzala wakhe.
“Bengisaphumile ngisesitolo ngibashiye endlini kuxoxwa. Emini bekukade kunengxabano kuchukuluzwana. Ngesikhathi sengibuya esitolo, ngihlangane no… (esho umsolwa) ngambuza ukuthi kwenzekani endlini ngoba ngiqeda ukuzwa uNhlanhla ohlala khona ethi sekugwazwe uSamkelo.
"Uthe uyabuya, waqhubeka wehla egijima.
"Ngifike endlini ngamfica uSamkelo igazi litshaza, liphuma ngamakhala nangomlomo waze washonela khona embhedeni. Sibize amaphoyisa nabezimo eziphuthumayo, bamthatha bahamba naye,” kusho yena.
Okhulumela amaphoyisa KwaZulu-Natal, uColonel Thembeka Mbhele, uthe amaphoyisa asaphenya.