IKHALE NGAMAPHOYISA I-IFP KUBULAWA ILUNGU
ISOLE ukushaya ngolonwabu kwamaphoyisa ukungenela emkhubeni wokubulawa kosopolitiki iNkatha Freedom Party (IFP), emuva kokudutshulwa kubulawe unobhala wayo wesifunda uThukela ngoMgqibelo ntambama.
Kubikwa ukuthi uMnu Zakhele Joseph Mazibuko (44), udutshulwe emgwaqweni u-R74 phakathi koMtshezi noMnambithi ebuya emhlanganweni we-IFP obusemahhovisi ayo eMtshezi.
Ngokuthola kweLANGA, ulandelwe yimoto encane ebigijima ifuna ukudlula eyakhe, okuthe uma seziqondene ngokwemizila, enye insizwa ebikulena enye imoto, yaveza inganono ngewindi yadubula washonela khona lapho.
Ngaphandle kokuba ngunobhala we-IFP oThukela, uMnu Mazibuko ubeyimenenja ophikweni olubhekelele ezempilo kuMasipala uThukela.
Silobe kungakacaci ukuthi uMnu Mazibuko uhlaselelweni.
USihlalo we-IFP oThukela, uMnu Mbuzeleni Mkhize, uthe kwenzeka lokhu nje, baqokwe ngoNtulikazi (July) ukubhekana nezinhlelo zeqembu kulesi sifunda.
“Besiyoxoxa ngezinhlelo zokuthi iqembu lizowathola kanjani amavolontiya njengoba sibheke okhethweni lwangonyaka ozayo. Akukho okuyingxabano ebesikwazi,” kusho uMnu Mkhize.
Okhulumela i-IFP kuzwelonke, uMnu Mkhuleko Hlengwa, uthe balimele kakhulu ngokushonelwa nguMnu Mazibuko obesebenza ngokuzimisela eqenjini.
"Ukwanda kwalesi sihlava sokubulawa kosomubusazwe kakukuhle, kubukeka sekuyinto esemthethweni KwaZulu-Natal ngenxa yokungenzi kahle kwamaphoyisa. Ukushaya kwawo ngolonwabu kubukeka kudala izinkinga.
"Okwamanje sigqugquzela ukuthula kubantu ukuze uphenyo luhambe kahle. Sidlulisa amazwi enduduzo emndenini wakwaMazibuko, izihlobo nabangani ngalesi sikhathi esinzima,” kusho uMnu Hlengwa.
Ilungu lomndeni kamufi, uNkk Hilda Mazibuko-Ntuli, lithe nabo basashaqekile ngokwenzekile.
“Ubhuti akaze asho nokuthi kukhona okungahambi kahle eqenjini lakhe noma emsebenzini. Silimele kakhulu ngoba nguyena obehlala ekhaya ebheke umndeni,” kusho uNkk Ntuli.
Utshele ILANGA ukuthi kwenzeka lesi sigameko nje, bebebabili emotweni kodwa akalimalanga lona obehamba noMnu Mazibuko.
Okhulumela amaphoyisa KwaZulu-Natal, uColonel Thembeka Mbhele, uthe icala mayelana nalolu daba liphenywa esiteshini samaphoyisa aseMtshezi. Akekho umuntu oseboshiwe.