AKAFUNI KUBOSHWE UMFOWABO ODINDE INGANE MGESIBHAXU
USHAYA phansi ngonyawo owesifazane waKwaSanti, eThekwini, uthi ngeke avume kuboshwe umfowabo obhaxabule ingane yakhe (lona wesifazane) yasala imidwayidwa, icishe yavaleka iso ngoba eyisola ngokudla u-R10 obekufanele kuthengwe ngawo igilobhu.
Lo mfanyana (11), esinqume ukungalivezi igama lakhe ukumvikela, nokusabalale izithombe zakhe izolo ezinkundleni zokuxhumana egcwele imivimbo, iso licishe lavaleka, kuthiwa ushaywe nguninalume, uMnu Mthokozisi Khuzwayo (26), kwaze kwangenela omakhelwane esho ukuyibulala ngenduku nangezibhakela.
Abanye omakhelwane kuthiwa bebephansi phezulu bebiza amaphoyisa. Unina kaBafana, uNkz Phili Khuzwayo (31), ubengekho esemsebenzini ngesikhathi sesigameko kodwa ufike wathi umfowabo makangaboshwa.
Ekhuluma neLANGA omunye womakhelwane - obize amaphoyisa - ozibonele le ngane idindwa ngenduku, uthi uMnu Khuzwayo ubeyishaya ize igingqike phansi, ayivuse ayinenebule.
“Sibize amaphoyisa ngoba sibona ukuthi akusekhona ukusola ingane lokhu akwenzayo, kodwa sekuwukuyihlukumeza. Akaqali ukuyishaya le ngane njengoba ike ihlale isonto lonke ingayi esikoleni kuthiwa isalimele ngenxa yokushaywa. Sibize amaphoyisa ngoba besinethemba lokuthi uzoboshwa, afunde isifundo kodwa kwangenzeka njengoba namanje esezichanasela,” kusho lo makhelwane.
UNkz Khuzwayo ukhale ngomakhelwane bakhe, wathi sebemenze inhlekisa basabalalisa izithombe zengane yakhe ilimele ezinkundleni zokuxhumana. Uthi noma kuthiwa uninalume umshayile umfana kodwa ubemsola njengezingane zonke.
“Bona ukube bebengomakhelwane abangithandayo, bebezongithinta bangazise ngokushaywa kwengane yami, hhayi ukuthi babukise ngayo koFacebook. Yize ngibonile ukuthi isandla siye seqa kumalume, wayishaya kakhudlawana ingane, kodwa ngeke ngivume ukuba aboshwe ngoba nguyena ongibhekela lezi zingane zami uma ngiye ematohweni. Uma eseboshwa zizodlani izingane zami uma zibuya esikoleni ngoba ziphekelwa nguye lo malume?
“Amaphoyisa afikile amkhuza ngoba omakhelwane bawabizile, kangikholwa ukuthi usazophinde akwenze,” kusho uNkz Khuzwayo.
Imizamo yokuthola uMnu Khuzwayo iphunzile njengoba ucingo lwakhe belungangeni.
Okhulumela uMnyango wezokuThuthukiswa koMphakathi KwaZulu-Natal, uMnu Vukani Mbhele, uthe bewumnyango bayasigxeka isenzo sokushaywa kwengane ngale ndlela ngoba sekuwukuyihlukumeza.
“Sicela umthetho udlale indawo yawo, umalume aboshwe njengoba nathi sizothumela ithimba losonhlalakahle kulo mndeni sibone ukuthi ingane singayisiza kanjani,” kusho uMnu Mbhele.
Okhulumela amaphoyisa KwaZulu-Natal, uCapt Thulani Zwane, uthi umndeni kumele ungaluthathi kalula udaba lokushaywa kwengane ngoba kuyicala.
Ucele umndeni walo mfanyana ukuba uvule icala emaphoyiseni aseduzane ngoba nawo ungazithola sewubhekene nengalo yomthetho uma uqhubeka ufihla icala.