UCIKEKILE OQHUNYISWE NGEMPAMA YISIKHULU
IGAYA izibozi inhliziyo yowesilisa waseMtubatuba oshaywe yisikhulu sikaMasipala waseMtubatuba ngolabhabha wempama simsola ngokuvimba abantu endaweni obekwenzelwe kuyona umcimbi.
UMnu Mandlakayise Madlopha (50), uthi lesi sikhulu - sikamasipala esiligodlile igama laso - kasigcinanga ngokumshaya, sibuye samkhomba ngesibhamu sifuna ukumdubula.
Lesi sigameko uthi senzeke ngesikhathi kunomhlangano wokugcoba iziko le-Inkatha Freedom Party (IFP) oGagwini. Echaza uMnu Madlopha, uthi bebefika kule ndawo ehamba nabanye abantu ababili. Bafike bama ngasemnyango, balunguza ukuthi bazohlala ngakuphi. Bame eduze kwabanye abantu abebemile. Uthi lesi sikhulu sifike kubona sathi kade sishilo ukuthi bavimba indlela.
“Thina ngoba besizifikela singazi nokuthi ukhuluma ngani, siqhubekile sazimela. Sivela saqonda ngqo kimi sangisakaza ngempama.
“Ngivele ngasangana ngoba bengingazi ukuthi ngishayelwani, kwangafika kimina nokuthi ngimbuze ukuthi ungishayelani njengoba ubenolaka. Uvele wakhipha isibhamu enqulwini wangikhomba ngaso.
“Kangibange ngisawuthamela nalowo mcimbi, ngivele ngangena emotweni ngahamba. Into engicika kakhulu wukuthi ngishaywa yingane engangelami nokungelama ngoba nakhu iyisikhulu sikamasipala.
“Ngithe sengiyobika udaba emaphoyiseni, angitshela ukuthi lesi sikhulu sesigijime savula icala kuqala sithi sishaywe yimina ekubeni ngingazange ngikwenze lokho futhi nginanofakazi abasibonile singidabula ngempama,” kusho uMnu Madlopha.
Uthi into emphatha kabi kakhulu ngaleli cala wukuthi ugcine etshelwa ngumphenyi walo ukuthi basaphenya emuva kwalokho kabaphindanga bamazisa okuqhubekayo.
Okhulumela amaphoyisa KwaZulu-Natal uCol Thembeka Mbhele, uthi amaphoyisa aKwaMsane aphenya icala lokushaya nelokukhomba umuntu ngesibhamu, akekho osaboshiwe.