BEKUVALWE NGOMUNTU EMNYANGO E-BAY
UHLANYISE abantu ngengoma uDJ kaBlack Coffee, obedlala endaweni yokujabula eseduze kwesikhumulo semikhumbi eRichards Bay, iNeighbourhood.
U-DJ Enno Napa, osezakhele udumo emazweni angaphandle, ungene noDJ Merlon sekuzosa kule ndawo kade kukhala igqom ubusuku bonke, bafike bashaya i- deep house kwasangana abantu.
Lo DJ uyingcosana lana eMzansi, isikhathi esiningi udlala emazweni angaphandle kwazise ungaphansi kwenkampani kaBlack Coffee, iSoulistic Music.
Kulo mcimbi, obizwa ngeYadini Legacy Activation, bekuboshelwe oDJ abadlala Eyadini okubalwa kubona uDJ Merlon, uDJ Boonu, uDJ Meech, uDJ Tukzin, ukubala abambalwa.
Bekunandisa uDanger owaduma kakhulu kwiBig NUZ, naye ongene kwasangana inkundla, behlanyiswa yizingoma zakhe ezintsha.
Amalungu omphakathi abephume ngobuningi, kuvalwe ngomuntu emnyango. Kuze kwasa ziqhudelana ngengoma engekho oshaya into ephansi. Kwabebephethe uhlelo bekukhona noJabulani Shandi Ematshana osuka ngakhona eBay.
Ubeshaya amatemu adume ngawo abantu bawananele.
Lo mcimbi uhambele oshisanyama abahlukene okubalwa kubona iMashamplane’s, iMetro Gents, i-Artizen, nezinye, uzoqhubeka ngoLwesihlanu ePitoli, e-Ayepyep Lifestyle bese ngomhlaka 29 kuya ku-30 kuyona lenyanga kube nendumezulu yomcimbi wokugubha iminyaka emihlanu Iyadi likhona.
Amathikithi aseyatholakala eComputickets ngo-R150, izicukuthwane u-R300.