Bazogubha engama-21 abesicathamiya
AZOGUBHA iminyaka ewu-21 amaqembu esicathamiya kwasungulwa umncintiswano wawo ePlayhouse, eThekwini okuhloswe ngawo ukuqhakambisa lo mculo owaziwa ngokudlulisa umyalezo owakhayo emphakathini.
Njengoba kuyinyanga yamagugu, inhloko ewumqondisi wezobuCiko ePlayhouse, uNkk Linda Bukhosini, ithi mhla ka-22 kule nyanga kuzobe kugujwa le minyaka baqhamuka nombono wokufukula isicathamiya.
Uthi nakuba lo mculo kusekhona abawungabazayo, kodwa isasasa lawo libukeka likhula kakhulu ngenxa yeqhaza elibanjwa ngamaqembu, okubalwa kuwona ngisho aqhamuka kwezinye izifundazwe njengoba kuwumncintiswano wakuzwelonke.
“Ngiyaziqhenya kakhulu ngokuthi ngikwazile ukwamukela lolu hlobo lomculo ezinhlelweni zethu ePlayhouse zokuthuthukisa amaciko nokuqhakambisa abenza kahle njengoba lo mncintiswano usukhule kanjena.
IBlack Mambazo ingelinye lamaqembu abambe iqhaza elikhulu ekuphakamiseni lo mculo, yingakho kufanele sisebenze kanzima ukuze siveze namanye amaqembu azofika esigabeni sayo (iMambazo).
Lo mculo usudonse abalandeli bawo abaningi abadabuka eGauteng nase-Eastern Cape imbala,” kusho uNkk Bukhosini.
Angaphezulu kuka-100 amaqembu kacothoza azobe edlana imilala, ebangisana ngesiteki sika-R200 000 eqoqweni le- top- 20.
Ngeke kugcine ngokuba kuboshelwe ucothoza kwazise izincwasimende zezinsizwa zizobe zidliselana ogageni ngemfashini kowoswenka kanti izintokazi zizokhiphana inkani kokazime.
Kulo nyaka kuzobonakala namaqembu angajwayelekile ukubamba iqhaza, adlala isitayela sengoma busuku, azonandisa.
Amathikithi okubukela lo mgubho aseyatholakala ezitolo zakwaShoprite/Checkers, naseComputickets ngo-R80.
Ngokusho kwabasePlayhouse, izihambeli zomcimbi zizohlelelwa izindawo zokupaka izimoto kanti ngemininingwane yokubhukha kuxhunyanwa nale nombolo: 031 369 9540/ 031 369 9596.