ITheku liphambili ngokushayela kabi
Ucwaningo lukhombisa ukuthi imigwaqo yakuleli iyingozi kakhulu
KONAKELE emigwaqweni yeTheku njengoba ucwaningo lwenkampani yomshwalense, iDiscovery, olubizwa ngeRoad to Healthier South Africa - olusabalale ngeledlule - luveza ukuthi abashayeli bakhona bashayela kabi ukwedlula abakuwona wonke amadolobha aseNingizimu Afrika.
Kuvela ukuthi iningi labo lisuka ngesivinini kanti lima ngokuphazima kweso uma libhuleka.
Lolu cwaningo luveza ukuthi imigwaqo yaseNingizimu Afrika ibalwa neyingozi kakhulu emhlabeni jikelele, kufa abantu abawu22.5% kwabawu-100 000.
Abashayeli baseThekwini balandelwa ngabasePretoria nabaseGoli ngokushayela kabi. Kuvela ukuthi iPort Elizabeth neBloemfontein ngamadolobha asendaweni yesibili neyesithathu kwahamba phambili ngokuba nabashayeli abashayela kahle.
AbaseCape Town kuthiwa kabavamile ukushayela besebenzisa umakhalekhukhwini, kodwa-ke balandela iBloemfontein ngokuba nabashayeli abakhonze ukushayela ebusuku.
EGoli kuthiwa kabakukhonzile ukushayela ebusuku, ikakhulukazi uma kuthiwa imigwaqo kayiphephile. Lo mbiko uveza nokuthi abesifazane abaneminyaka ewu-66 kuya phezulu, bashayela kahle kakhulu eNingizimu Afrika kanti kwabesilisa abaphakathi kuka-1825, kuyabhujwa.
USolwazi Sebastian vas As, oyinhloko yophiko olusebenza ngokuhlukumezeka ngokomqondo kwiRed Cross War Memorial Children’s Hospital, uthi ukushintsha indlela abantu abashayela ngayo yikhona okungabasiza ukuba baphephe emigwaqweni.
“Ngisho kungayiwaphi kuyiwephi, kodwa konke kuya eqinisweni elithi cishe u-90% wezingozi zomgwaqo udalwa ngabantu abashayela kabi - iphela lapho nje le ndaba,” kusho uMnu Van As kulo mbiko wakwa-Old Mutual.