ITHEMBA NGOKUSIMAMA KWERANDI LAKULELI
LINGASE lithole amandla ngokushesha irandi uma nje leli fu elimnyama eligubuzele izimakethe ezisathuthuka like lagudluka. Lokhu kushiwo yiNhloko yeOld Mutual Investment Group, uMnu Johann Els, embikweni wayo ewulobela amakhasimende ale nkampani edume ngemishwalense.
Uthi futhi izimakethe zithathe mawala mayelana nezibalo zemikhiqizo yaseNingizimu Afrika ekhombise ukwehla - kakhulukazi ezolimo nezimayini - okwenze umnotho wakuleli wazika ( recession) , emuva kweminyaka ewu-10 kugcinile ukwenzeka.
Irandi lehlelwe yishwa lokuzithela phezu kwalokhu abanye kwezomnotho abakubize ngesivunguvungu - lehla kakhulu emasontweni edlule uma liqhathaniswa nedola lase-United States of America (USA), nokho labuye lathola amandla lathi ukusimama - ngokusho kukaMnu Els.
Ukudunguzela kwalo kwenzeke kabi kwanqwamana nokunyuka kwentengo kawoyela ongahluziwe, okwenza abanye osomnotho bakholwe wukuthi iReserve Bank izonyusa inzalo yemali ebolekiwe uma ikomidi layo lezemali seliqede umhlangano walo ngoLwesine.
UMnu Els uthi akaboni izimakethe ezisathuthuka zizongena ezinkingeni zize zivele ngamakhanda - ngenxa yefu elizigubuzele emhlabeni. I-Turkey neArgentina ngamanye amazwe acwile ezinkingeni ezibhekene neminotho esathuthuka.
I-Turkey ivele yenyusa inzalo yemali ebolekiwe ukuzama uku- qhubeka nempilo. Lokhu kusize imali yakhona (lira) yasimama, kwabuya ithemba ngokuswabuluka kwezimakethe ezisathuthuka emhlabeni jikelele.
UMnu Els uthi izimakethe ezisathuthuka zihleleke kahle uma kukhulunywa ngokukhula, inzalo yemali ebolekwayo nokunye uma kuqhathaniswa nesimo ebezikusona ngo-2013. Uthi yize ekholwa wukuthi iNingizimu Afrika idinga izi-nguquko endleleni izinto ezenzeka ngayo, ukunika umnotho indawo yokukhula, uyacabanga ukuthi uMengameli Cyril Ramaphosa usewubekile umkhombandlela, kodwa (uMnu Ramaphosa) usadinga umgomo omusha azowulandela ukuqinisekisa izinguquko kwezomnotho.
Ukholwa wukuthi ukulahla ithemba sekufana nesiko kubantu baseNingizimu Afrika, kodwa izinto zisaba ngcono.
“Uma kube nezinguquko ezinhle emigomeni kahulumeni emuva kokhetho lukazwelonke ngo2019, lokho kungaholela ekubeni irandi lisimame ngamandla ngenxa yethemba kubatshalimali bangaphandle, osomabhizinisi nabathengi bakuleli,” kusho uMnu Els.
Ntambama ngoLwesihlanu, irandi beliku-R14.8728 uma liqhathaniswa nedola lase-USA liphuma egunjini labagula kakhulu njengoba like lashoshela ku-R15.70 emasontweni edlule.