UMQEQESHI USOLWA NGOKUBA YIGWALA
USOLWE ngokuba yigwala umqeqeshi weMaritzburg United, ezakhe zibambana ngo-0-0 neBidvest Wits kowe-Absa Premiership ngoMgqibelo kusihlwa eHarry Gwala Stadium, eMgungundlovu.
Lo mdlalo ububhekwe ngabomvu ngabathandi bebhola kwazise bekubhekene ikilabhu ephansi emsileni we- log neqhwakele.
Nokho awuzange ufike ezingeni ebelilindelwe njengoba kuvele kwabhoka indlala yamagoli. Nabalandeli bebeyingcosana kanti kuyaziwa ukuthi iMaritzburg uma idlalela ekhaya, iheha inqwaba yezibukeli.
UGavin Hunt ocija iWits, uwuqondise kuFadlu Davids umunwe wathi ube yigwala yingakho amagoli engazange abonakale.
“Sibe nomdlalo omuhle, sikho- mbise zisuka ukuthi sifuna ukuwunqoba lo mdlalo sihlasela. Kodwa-ke kube nzima ngoba besidlala nekilabhu esebenzise amasu obugwala.
"IMaritzburg bekungathi iyona ehambile iqale umdlalo ngabadlali basemuva abayisihlanu. Ngiphoxe-kile, bengithi sizoziyeka zibulala-ne, kodwa akwangenzeka. Akuse-nani sijabule ngephuzu esilitholile,” kusho uHunt.
UDavids uthi ujabule ngephuzu abalitholile.
“IWits akusilona iqembu ongavele ulizele nje noma yikanjani, kufanele ucabange uma uzobhekana nayo. Okokuqala nje isefomini kulezi zinsuku, iyasidedela isibhaxu. Besingawunqoba lo mdlalo siwatholile amathuba sangawasebenzisa. Ngijabule ngephuzu esilitholile kungcono kunokungatholi lutho,” kusho uDavids.