Kubanjwe umoya ngomdlali
Abazimisele ukwehlulwa ekhaya
IBAMBE umoya iRichards Bay FC egijima kwiNational First Division (NFD), ngomdlali wayo omqoka emboleke kwi-Orlando Pirates okuvela ukuthi uke wangajima ngenxa yokuxinwa wumkhuhlane.
IBay izobhekana neCape Umoya United koweNFD namuhla ngoMsombuluko ngo-15h00 eCape Town Stadium. IBay iya kulo mdlalo nje, ziyihambela kahle izinto njengoba ingakaze yehlulwe selokhu kuqale iligi. Emidlalweni emithathu inqobe emibili, yadlala ngokulingana kowodwa.
Ibhekene neCape Umoya nayo engakahlulwa futhi engakanqobi mdlalo selokhu kuqale isizini. Isayidlale ngokulingana yomithathu imidlalo esayigijimile. USifiso “Jomo” Biyela ongusihlalo weBay, utshele leli phephandaba ukuthi babambe umoya ngoSandile Mthethwa odlala emuva okuthiwa umiswe kabi wumkhuhlane.
“Amalungiselelo alo mdlalo ahambe kahle, yikhona nje ukuthi sike saphazamiseka njengoba bekugula uMthethwa obexinwe wumkhuhlane. Uke wangajima ngithi izinsuku ezintathu ngenxa yokuxineka.
"Ujimile ngoLwesihlanu kodwa kasazi noma uzobe esewulungele yini umdlalo,” kusho uBiyela.
Uthi ngeke bayithatha kancane neze le kilabhu abazobhekana nayo ngoba bangazifaka engozini. “Njengoba bengakanqobi mdlalo nje, sikulindele ukuthi bazofuna ukuvuka ngathi. Ngabe senza iphutha elikhulu uma singababukela phansi ngoba abadlali abebegijima ngabo kwiPremiership, iningi labo behle nabo kulesi sigaba.
"Siwulindele lo mdlalo futhi nekhefu leFifa ebesinalo silisebenzise ngendlela ukulungisa lapho obekungalungile khona,” kusho uBiyela. URoger de Sa, ongumqeqeshi weCape Umoya ophinde abe ngusihlalo wayo, uthi bayayihlonipha impela iBay, kodwa ngeke bakuvumele ukuthi ibehlulele ekhaya.
“Sizibekele umgomo wokuthi imidlalo yasekhaya kufanele singawalahli nakancane amaphuzu. Selokhu kuqale isizini isabambe ngakho njengoba singakahlulwa, kodwa kufanele singakhohlwa futhi wukuthi asikanqobi mdlalo.
"Lona yiwona okufanele siwunqobe sibe nesikhathi esanele ukuwulungiselela,” kusho uDe Sa.