Omunye umasikandi nokugula kukaMjikijelwa
EKHASINI 5: Uphume esteji esexhakiwe
UPHUME esexhakiwe esiteji umculi kamasikandi ocishe wawela phambi kwezihlelwe evukwa wukugula okushiye abantu benengekile abanye bebhocobele.
UMnikezwa Ngubane, ongumfowabo kaSibongiseni “Mjikijelwa" Ngubane, iChalaha likaShafuza (ongasekho) - ohambe ngokugula okufanayo nokuvuke uMnikezwa - usizwe ngozakwabo emcimbini obuKwaThayela, eNdwedwe, ngoMgqibelo, engasakwazi ukuqhubeka nokucula.
Ngokuthola kweLANGA, ukugula kwakhe kuyafana nokukaMjikijelwa, oshone ngoNhlaba (May) ngoba naye uqalwe yisilonda ethangeni kwabe sekwehlela ezinyaweni.
Umthombo weLANGA osondelene kakhulu nalolu daba, uthi sekuphele izinyanga ezimbili uMnikezwa egula kodwa kufihliwe ngenxa yokuthi kunezindaba eziningi ezilokhu ziphumela emphakathini ezithinta umndeni wakwaNgubane.
“Ukugula kwakhe kubukeka kuzofana nalokhu obekuphethe uMjikijelwa ngoba waqala wakhala ngeqolo ethi kunento eshisayo uma egibele imoto kanti naye uMnikezwa yiso leso njengoba sekuya ngasezinyaweni, ekhomba nezibhobo.
“NgoNtulikazi (July), uphathwe ngamathumba ethangeni kwaze kwavuleka isilonda okuze kube yimanje kawapholi njengoba eseqhinwa (esebanjwe) yizimbilaphu, okuyinto efanayo nalena uMjikijelwa ayekhala ngayo,” kusho umthombo.
UNkz Minenhle “Advocate” Ngubane oyimenenja yalo mculi, uthi bebekufihlile lokhu kugula ngoba bezitshela ukuthi yinto encane ezosheshe idlule.
“Lokhu kugula kumqale ekupheleni kukaNtulikazi ebuya esitudiyo eyoqedela i-albhamu yakhe yeSimakwana sikaShafuza. Kube yinto encane eyibala, evele eqolo, kuthe kujika yamumila emlenzeni seyiyisilonda, kwagcina ngokuba angakwazi ukuhamba kahle. Sonke lesi sikhathi ubeziqinisa nathi-ke safihla, kwazise sisanda kushonelwa ngubhuti (uMjikijelwa) ekhaya, izwe lisasibhekile kakhulu,” kusho uNkz Ngubane.
Imizamo yokuthola yena ngqo uMnikezwa kayiphumelelanga, ucingo lwakhe belukhala lungabanjwa. Kuzokhumbuleka ukuthi uMjikijelwa kuthiwa naye uqalwe wukugula uma eshayela imoto. Kuvele ukuthi ubekhala ngokukhathala.
Ukufa bekumqinisa kakhulu uma ethi uyocula esitudiyo, kwavuvukala izinyawo wamilwa izilonda. NgoMbasa (April), ufike kwiMTN Masikandi Festival eCurries Fountain, eThekwini, ekhukhumele isisu edondolozela ngobhoko. Naye ugcine esephuma ebanjiwe, kanti ubevele efike ezihudula ngenxa yokugula.