Ubhekene nengwadla umqeqeshi weKings
Ulinyalelwa ngabadlali abamqoka
UBHEKENE nengwadla umqeqeshi weReal Kings egijima kwiNational First Division (NFD), ngaphambi komdlalo omqoka neTS Galaxy ozokuba ngoMgqibelo ngo-15h00 eSugar Ray Xulu Stadium, eClermont.
USimo “Govuza” Dladla (osesithombeni) ocija iKings, utshele ILANGA izolo ngoLwesithathu ukuthi uzokuya kulo mdlalo ngaphandle kwabadlali bakhe abamqoka. Uthi okunzima nakakhulu wukulimala kukaMlungisi Mazibuko ongunozinti othinteke eqakaleni ekubeni noPapy Faty owaquleka emdlalweni isimo sakhe kasikalungi.
“Kunzima kakhulu engibhekene nakho njengoba sekulimele noMazibuko ekubeni nendaba kaFaty kayikalungi, kwazise silinde umbiko kadokotela ngesimo sakhe. Kuyimanje ngibamba ngiyayeka njengoba ngingase ngiphoqeleke ukuba ngisebenzise umdlali osemncane ongenaso isipiliyoni sokudlala kwiNFD.
“Ngaphandle kwalokho, nginethemba lokuthi abadlali abazothola ithuba bazolibamba ngazo zo- mbili ukunqoba lo mdlalo wethu wasekhaya. Okubalulekile wukuzama ukulwela ukuthola amagoli kuqala ukuze izitha zizokuba ngaphansi kwengcindezi,” kusho uDladla.
UTom Dlamini, wezokuxhumana kwiKings, unxuse abalandeli ukuba bafike ngobuningi babo kulo mdlalo ukuzofaka abadlali ugqozi. Uthi okuhle wukuthi kuzokube kungenwa mahhala enkundleni.
IKings izoqeda ngomdlalo weTS bese ilungiselela owoThongathi FC ozokuba ngoLwesithathu olu- zayo ngo-15h00 ePrincess Magogo Stadium, KwaMashu. Lo mdlalo bekumele ugijinywe ngeledlule kodwa wahlehliswa emuva kokubulawa komnikazi woThongathi FC, uNico Mkhize.
Kuzo ezeNFD, iTS Sporting isayinise uKatlego “Mahoota” Mashego obedlala kwiFree State Stars. Usayine inkontileka yesizini.
Isiyonke imidlalo yeNFD ezokuba ngempelasonto ihlelwe kanje:NGOMGQIBELO ESugar Ray Xulu: Real Kings vs TS Galaxy 15h00.
EMbombela: Mbombela United vs TS Sporting 15h00.
ECape Town: Ajax Cape Town vs Maccabi FC 15h00.
ETuks Stadium: Pretoria University vs Royal Eagles 15h00.