USEFUNA UKUSHIYA OYIFENISHA KWI-CHIEFS
Umiswe kabi nguMphahlele esikimini
USEFUNA ukuhamba kwiKaizer Chiefs umdlali wayo okuvela ukuthi udinwa wukuthi usephenduke isichuse sale kilabhu iminyaka eminingi.
IChiefs ziyihambela kahle izinto kulezi zinsuku njengoba ishaya kwasani eza phambi kwayo. Nakuba kunjalo kodwa leli phephandaba lithole ukuthi uKgotso Moleko odlala emuva kule kilabhu ufuna ukuhamba uma kuwukuthi uyaqhubeka nokukhuhla ibhentshi. Lo mdlali ujoyine iChiefs ngo2012 esuka kwiBloemfontein Celtic.
Selokhu afika kule kilabhu isikimu akakaze asenze kube ngesakhe, kunalokho uwukudla kwebhentshi. ILANGA lithole ukuthi lo mdlali usenele yibhentshi, usefuna ukuya lapho ezodlaliswa khona. Kuthiwa iCeltic ifuna abuye kwazise vele ungumfana wakhona eBloemfontein.
“UMoleko usehlale kakhulu kwiChiefs engadlali, ubona kungcono ahambe manje aye lapho ezodlaliswa khona ngoba uzibona esekhulile ukuthi angaphila ngokukhuhlana nebhentshi. Into eyenza afune ukuhamba wukuthi ubanga ijezi noRamahlwe Mphahlele odlala njalo futhi omuncane kunaye ngokweminyaka yobudala.
“Ngesikhathi kuhamba uSiboniso Gaxa ubezitshela ukuthi uzoqala adlale kodwa akwaze kwenzeka njengoba kuvele kwalandwa uMphahlele.
"Kungenzeka kube yisizini yakhe yokugcina lena edlala kwiChiefs uma kuwukuthi isimo sakhe kasishintshi,” kusho umthombo oncikene kakhulu nalo mdlali.
UBobby Motaung oyiMenenja-jikelele yeChiefs, ushaye ngamafuphi wathi kakusona isikhathi sokukhuluma ngabadlali lesi. Uthe babheke ukuqinisekisa ukuthi ikilabhu iyaqhubeka nokukhiqiza imiphumela egculisayo.
UMoleko usehlale kakhulu kwiChiefs engadlali, ubona kungcono ahambe...