UBULAWE EMSHADWENI KWAHLEHLA UMEMULO
Umufi ubelungiselela ukwemulisa indodakazi yakhe
UPHELE sekumuncu umshado wakwaKhumalo eNhlangenyuke, eMthunzini, ngaphansi kweNkosi yakwaMkhwanazi, emuva kokuba kudutshulwe kwabulawa umakhelwane egcekeni lakhona ngeSonto.
Kuthiwa uMnu Zwelithini Mhlongo (58) udutshulwa kulo mcimbi nje, naye ubenomcimbi kwakhe kodwa waya kwaKhumalo eyovela njengoba bakhelene.
Kakucaci kahle ukuthi yini imbangela yokudutshulwa kwakhe, kodwa kubikwa ukuthi indaba isuswe yinduku (umgangela).
Kubikwa ukuthi ngesikhathi kubuywa esigcawini, kuneviyo elivimbezele ngenduku abebesesigcawini, kodwa kwabuye kwakhuzwa, yadlula leyo nto.
Kuthiwa makhathaleni kuqubuke impi, kwabakhona odubulayo kanti kuzodubuleka uMnu Mhlongo, okuthiwa yena ubengaphethe ngisho izinduku.
UMnu Khumbulani “Gugushe” Mhlongo, indodana kamufi, uthi uyise ushona nje, ubenza amalungiselelo omcimbi omkhulu obuzoba mhla ka-7 kuMfumfu (October), lapho abezobe emulisa khona indodakazi yakhe.
Uthi ngelanga abulawe ngalo bebehlabe isilwane, kungeniswa udadewabo endlini ukulungisela lo mcimbi womhla ka-7.
“Mina ngisheshe ngahamba (emshadweni) ngoba bekumele ngiyolungisa ekhaya, ubaba yena wasala khona kwaKhumalo. Uma ngizwa, kuthiwa indaba isuke sekufike iviyo ebeliqhamuka eManyameni (ngaphansi kweseNkosi yakwaMzimela khona eMthunzini).
“Leli viyo beliphethe izinduku, kwagcina kukhona odubulayo. Konke sesikubeke ezandleni zamaphoyisa ukuze kuboshwe umuntu owenze lokhu,” kusho yena.
Uthi emuva kokushona kukayise, baphoqelekile ukuhlehlisa umcimbi, bashweleza nasedlozini bakhipha udadewabo endlini - njengoba ebesegonqile elindele umhla ka-7.
“Ibuhlungu into esehlele lapha ekhaya, kasifuni ukuqagu- la ukuthi ngubani owenze lokhu, kodwa konke sizokushiyela emaphoyiseni,” kusho yena.
UMnu Mbuyiseni Khumalo, obeshadelwa, uthi kumphathe kabi ukuba umcimbi wakhe uphele sekumuncu ngale ndlela.
Uthi yize engazi ukuthi bekubangwani, kodwa uyakhumbula ukuthi ngesikhathi ephuma esigcawini, bavinjezelwe yizinsizwa ebezivela eManyameni, zibonakala ukuthi kazizile ngesihle.
Kubaxakile lokhu ngoba iningi lazo bekungabantu ababaziyo futhi abangenangxabano nabo.
“Sithe uma nathi siya kubona ngoba sibabona ukuthi beza ngempi, kwalanyulwa kwadlula sabe sesingena ngaphakathi. Basuke lapho bafuna utshwala ngenkani, banikezwa.
“Kangazi ukuthi kubuye konakalaphi ngoba ngibone sekuliwa. Ngisethuswe yilokho, kuqhume isibhamu kanti sekudutshulwa uMnu Mhlongo. Kulimale nabanye abantu abebekhona lapho beshaywa nangamatshe,” kusho uMnu Khumalo.
Uthi kumphathe kabi ukubulawa kukamakhelwane wakhe ngale ndlela kanti bewumndeni bese beyile khona kwaMhlongo ukuyobhonga emswanini.
Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko.
Uthi kuvulwe icala lokubulala kanti okwamanje bekungakaboshwa muntu.