BAYAKHONONDA ABAMATEKISI NGOKUVALWA KWEZITIMELA
ABANIKAZI bamatekisi kososeshini abakhulu baseMlazi okungowakwaMNR nowakwaF&G, bathi ukungabi khona kwezitimela, kakubenzi bahleke bodwa ngoba kugcina sekudaleka izingozi abashayeli babo bejahe abantu abakolayini emarenki.
Bakusho lokhu njengoba izitimela zimisiwe yiPassenger Rail Agency of South Africa (Prasa) emuva kokuhlaselwa kwesiteshi sakwaJ kuleli lokishi ngoLwesihlanu oludlule.
Labo soseshini bathi ukungabikhona kwezitimela kuyabalimaza ngoba kukhahlamezeka izimoto ngenxa yokulayisha isibalo eseqile kwesifanele. USihlalo wakwaMNR Taxi Association, uMnu Zibuse Myende, uthi ngeke baze basho ukuthi bayahlomula ngokumiswa kwezitimela.
“Zikhona zingekho izitimela, siyagqilazeka. Izitimela kade zasigqilaza ngoba zithola izizumbulu zemali zixhaswa wuhulumeni thina singatholi lutho.
“Ngeke uzwe kuthiwe isitimela sithole ithikithi lokushayela kabi nelokulayisha isibalo eseqile, noma abantu bangaze bagibele naphezulu kwaso kodwa ngeke uzwe ukuthi kunecala lokuthi silayishe ngokwedlulele besesihlawuliswa ngalokhu,” kusho uMnu Myende.
Uthi uhulumeni usanda kwakha izinxanxathela zezitolo ezindaweni eziningi KwaZulu-Natal ukuphuca bona iqatha emlonyeni.
“Kithina esisebenzela eThekwini, umsebenzi uvele wehlile njengoba eMlazi kunezinxanxathela zezitolo yonke indawo, abantu kabasayi edolobheni, ngaphandle kwalabo abasebenzayo,” kusho uMnu Myende.