Sezibaliwe kwabenza uMatric
Abezemfundo bathi konke kumi ngomumo
AKUSEKHO ukujikela emuva kubafundi bakamatikuletsheni njengoba sekusele izinsuku ezingaphansi kuka-20 ukuba kuqale umshikashika wokubhala izivivinyo zokuphela konyaka.
Bawu-152 746 abafundi abazobhala umatikuletsheni ngokugcwele, ngokusho koMnyango wezeMfundo kulesi sifundazwe.
Izivivinyo zokuphela konyaka ziqala mhla ka-23 kuMfumfu (October) ngephepha lokuqala lesiNgisi kuzwelonke, nakuba zizobe sezibhaliwe izifundo zeComputer Applications Technology neInforamtion Technology mhla ka-15 no-16 kuyona le nyanga.
Umqondisi wezokubhalwa kwezivivinyo KwaZulu-Natal, uMnu Bunny Mthembu, uthi sebekulungele ukubhalisa abafundi ngenxa yezinhlelo ezihlabahlosile ezenziwe emnyangweni ukuze kuphakanyiswe izinga lokukhiqiza imiphumela emihle.
Uthi kuqeqeshwe othisha kwahlukaniswa izifunda, zahlanganiswa nezakwezinye izifundazwe ngenhloso yokuthi kucotshelelwane ngolwazi.
“Senze konke okusemandleni ukuthi sihambisa izinsizakusebenza ezikoleni ngoba besifuna kungabi khona isizathu sokuthi akusebenzekanga ngenxa yazo.
“Sihlale phansi saqhamuka namaqhinga azosiphumelelisa, sazibekela ukuthi umnyango wethu sifuna unyuke ngo-7% kuya ku-10% kulo nyaka, kanjalo nesifunda ngasinye sifuna sinyuke ngo-7% kuya phezulu.
“Sithe kasifuni ngisho esisodwa isikole esizothola u-0% kulo nyaka ngoba sikwazile ukuqoqela ndawonye lezo ezigile lo mhlola nyakenye, eDokkies, eThekwini sazinikeza uqeqesho.
“Ezithole u-100% nyakenye, sifuna ukunyusa isibalo sazo ngo-5%. I-Maths sizibekele ukuthi kumele inyuke ngo-5%, siphinde sikhuphule ama- bachelor ngo-5%,” kusho uMnu Mthembu.
Uthi izikole ezithole u-30% nyakenye nazo kuson- delwe kakhulu kuzona, kwaphinda kwandiswa namakilasi angeziwe.
Utshele ILANGA ukuthi bakwazile nokulanda izingwayingqwayi zothisha bakwezinye izifundazwe ukuze bezocobelela ngokufundiswa kweMaths.
“Njengoba kuzovalelwa uMandulo (September), sizokwenza amakilasi lapho kuzobhekwa khona konke obekuhlula abafundi ukuze kubuyekezwe,” kusho yena.
Utshele ILANGA ukuthi kuzobe kuqalwa ngqa KwaZulu-Natal ukuthi kubhalwe izifundo ezintsha okubalwa kuzona iTechnical Maths.
Uthi sinyukile isibalo sabafundi besifazane abazobhala njengoba bewu-83 958 kanti abesilisa bawu68 788.
Kuzoqiniswa kakhulu ukugadwa kwabafundi, ikakhulukazi ezifundweni ezaziwa ngokuthi ziyingozi, okubalwa kuzona iMaths, i-Accounting, iGeography, iPhysical Sciences, i-English neLife Sciences.
Ziwu-26 izikhungo zokumakela, awu-1 963 421 amaphepha azomakwa uma bebhale bonke abafundi.
Ukumaka kuqala mhla ka-26 kuLwezi (November) kuze kube mhla ka-14 kuZibandlela (December). Bawu-7 481 abazomaka, awu-74 ama- chief marker, awu-1 496 ama- senior marker, awu-214 ama- deputy marker kanti imiphumela izophuma mhla ka-4 kuMasingana (January).