'Udlwengule' ingane eyisola ngokujola
Uqale wayishaya ngefosholo
USESABA nokuthi indodakazi yakhe (17) iye esikoleni owesifazane waseNdwedwe emuva kokuba kudedelwe uyise wayo osolwa ngokuyishaya ngefosholo maqede wayidlwengula ngoba ecasulwa wukuthi isiyajola.
Ufikelwa yisibibithwane lona wesifazane - esingeke simdalule ukuvikela indodakazi yakhe - othi namanje akazi ukuthi ingane yakhe izozibhala kanjani izivivinyo njengoba umsolwa ededelwe ngebheyili.
Uthi naye unovalo ngoba uyise wengane ngesikhathi eqeda ukwenza lokhu, usabise ngokuthi uzoyenzakalisa uma ike yakhuluma ngakho.
“Indodakazi yami ingitshele ukuthi uyise ufike ekhaya (eNdwedwe) wayoyilanda ngoba ethi isiyajola. Uthathe ifosholo kwelinye lamagumbi maqede wahudula indodakazi yami wahamba nayo.
“Endleleni ubehamba eyishaya ngefosholo ngoba ezwe kuthiwa isinendoda. Kuqhamuke itekisi ebinabantu abaziyo wayimisa, okuthe uma bezama ukumkhuza kwanhlanga zimuka nomoya.
“Uhambe nayo indodakazi yami kukhona nabanye besilisa ababili emotweni abehamba ngayo. Uqale wayoshiya bona wabe esesala nendodakazi yami emotweni, okuyilapho ayidlwengule khona. Uqede lapho wathi akanqeni ukuyibulala bese ezilengisa uma ike yakhuluma lolu daba,” kusho yena.
Uthi ube eseyinqabela ukuba ibuyele kuninakhulu, wahamba nayo waya kubo wayivalela. Uthi ingane ibalekile yaya kuyena - endaweni esingeke siyidalule ukuvikela isisulu - lapho ahlala khona ukusondelela umsebenzi, yamtshela lonke udaba.
“Ingane ibisaba ukukhuluma kodwa yagcina ibhobokile, yangitshela ukuthi kwenzekeni. Okungiphatha kabi manje wukuthi iyabhala njengoba kuzovalwa izikole, ngiyesaba ukuyidedela ukuba iye esikoleni ngoba indlela idlula kubo kayise.
“Kuyacaca ukuthi kayiphephile njengoba esededelwe ngebheyili,” kusho yena.
Uthi umsolwa wenze lokhu nje, indodakazi yakhe inezinyanga eziwu-5 ikhulelwe.
Okhulumela amaphoyisa, uLt Col Thulani Zwane, uthi kuvulwe icala lokushaya ngenhloso yokulimaza nelokudlwengula. Umsolwa uvelile eNkantolo yeMantshi yaseNsuze, uzobuyela maduze.
Uqede lapho wathi akanqeni ukuyibulala bese ezilengisa.