Kubulawe usomatekisi nomshayeli
Ubephuma emakhaya ezoqala ngqa ukusebenza
Kube nomunyu emuva kokudutshulwa kubulawe umshayeli wetekisi obeyoqala ukusebenza izolo ngoLwesithathu esemotweni nomqashi wakhe ngaseWema, eThekwini, okugcine ngokuthi bashone bobabili.
ILANGA - elizifikile mathupha endaweni yesigameko -lifike izidumbu zabafi zinenqwaba yamanxeba okudutshulwa emzimbeni. Kubikwa ukuthi uMnu Sihle Zulu (38) waseNkandla obehlala eMayville, ongumnikazi wamatekisi asuka eWema aye eThekwini ngaphansi kukasoseshini, iDurban Line, udutshulwe ekwiVW Polo yakhe nomzala wakhe, onguMnu Praysgod "Khwalithi" Sikhakhane (35), abemlande emakhaya ukuba ayoshayela enye yamatekisi akhe. Ngokuthola kweLANGA, uMnu Zulu ubuye emakhaya ngoMsombuluko, ephuma ukuyolanda uMnu Sikhakhane. Behlelwa yilo mshophi nje, uMnu Sikhakhane ubeselindele ukuyongena emotweni eyoqala ukusebenza, akhonjiswe nomzila abezosebenza kuwona.
Kuthiwa kufike inqwaba yamadoda angaziwa ngezithuba zehora lesikhombisa ekuseni, angakhuluma lutho, avulela ngentululwane yezinhlamvu ebhekise kubona.
Kubikwa ukuthi uMnu Zulu ubejwayele ukuthi njalo ngoMsombuluko, uLwesithathu noLwesihlanu alande imali ekhokhwa yiwona wonke amatekisi ahamba emzileni wabo erenki abulawele ngakuyona. Kunezinsolo zokuthi ababulali bebemcuthele futhi bekufunwa yena, uMnu Sikhakhane uthelwe ngamachaphazelo.
“Yaze yabuhlungu le nto eyenzeke lapha, uKhwalithi ubefike izolo (ngoLwesibili) eThekwini ephuma emakhaya, ejabulela ukuthi uzoqala umsebenzi. Nabazali bakhe emakhaya bebejabule ukuthi indodana yabo isizosebenza ikwazi ukubeka isinkwa etafuleni.
“Kubuhlungu ukuthi ubulawe ngale ndlela, engakawuqali ngisho umsebenzi abelandelwe wona. Ngiyakhala ngomzala wami uSihle okunguyena obebhekelela izingane zakubo, ezenzela konke. Ushona nje, ubehlela ukwenza umcimbi wokuphothula ukuthwasa kukadadewabo. Kubuhlungu nje ngoba ushiye inkosikazi esencane nengane esancela ibele,” kusho ilungu lomndeni elikhulume neLANGA endaweni yesigameko.
UMnu Bongani Mhlongo ongumxhumanisi kwiSouth African National Taxi Council (Santaco), uthe badumele ngento eyehlele uMnu Zulu noMnu Sikhakhane.
"Kazikho zinxushunxushu ezikhona kulo mzila, sisashayisana ngamakhanda ukuthi ukubulawa kwabala kuhlobene nani. Sinxusa umphakathi ukuba usebenzisane nathi namaphoyisa ukuze kubanjwe abasolwa. Okhulumela amaphoyisa KwaZulu-Natal, uCapt Nqobile Gwala, uthe kuvulwe amacala amabili okubulala, bekungakaboshwa muntu.
Yaze yabuhlungu le nto eyenzeke lapha, uKhwaliti ubefike izolo eThekwini ephuma emakhaya, ejabulela ukuthi uzoqala umsebenzini. Nabazali bebejabule...