Uzonyuka futhi uphethiloli kuleli
Kuzoba nemashi ephikisana nalokhu ngoLwesihlanu
IZOPHINDA yenyuke intengo kaphethiloli ngoLwesithathu oluzayo mhla ka-3 kuMfumfu (October). Izinkomba zithi lokhu kuzoba wukwenyuka okukhulu kunakho konke osekuke kwenzeka ngesikhathi esisodwa emlandweni waseNingizimu Afrika njengoba uwoyela ongahluziwe usugijima ngaphezudlwana kuka-$82.01 (okulinganiselwa ku-R1 143) umphongolo njengamanje.
Kulindeleke ukuba intengo kaphethiloli yenyuke ngo-R1,12 ilitha, udizili wona kube wu-R1,38, ngokusho kwabakwaAutomobile Association of South Africa (AA).
Lokhu kwenyuka kwentengo kaphethiloli kuthinta cishe wonke amanani ezidingo zempilo yemihla ngemihla. Okokuqala okunomthelela, ngamandla emali yethu wona athintekayo ngqo ngenxa yokwenzeka ezimakethe zemali zamazwe ngamazwe.
Ekhasini lakhe layizolo enkundleni yokuxhumana iFacebook, uSolwazi Bonke Dumisa, usike elijikayo ngeminye yale mithelela emandleni erandi.
Uthe nakuba kunezimpawu ezikhuthazayo ngokusimama kwerandi, kodwa kubuye kube nezinhlangano ezinjengeFitch - ekala amazinga omnotho wamazwe - okuthi ngezizathu zombusazwe, ifune njalo ukuba umnotho waseNingizimu Afrika ubesesigabeni sovucu.
Okunye akuphawulile uSolwazi Dumisa, yindlela enza ngayo uMengameli wase-United States of America (USA), uMnu Donald Trump, oluma ephephetha.
Kolunye uhlangothi, ugxeka inhlangano yamazwe akhiqiza uwoyela, i-OPEC ngokungawenyusi umthamo womkhiqizo kawoyela ongahluziwe nokudala kube nokwenyuka kwamanani entengo yawo.
Ngakolunye uhlangothi, yena uMnu Trump usekhaleni lempi yezombusazwe yokuba kuphazanyiswe ( sabotage) uhwebo lweIran ngowoyela wayo, nakho okunomphumela wokwenyuka kwamanani kawoyela ongahluziwe.
Kulesi simo ukusimama kwerandi ebesikubona ezinsukwini ezimbalwa ezedlule, kuvele kwashanelwa wukwenyuka kwentengo kawoyela ongahluziwe, bese kuba nesidingo sokuba yenyuswe intengo kaphethiloli.
Ngamafuphi, ziwu-5 izinto ezihamba phambili ekubeni nomthelela kulokhu kwenyuka okungaka kwentengo kaphethiloli:
1. Inani lentengo kawoyela ongahluziwe elishoshela ku-$100 (1429) umphongolo;
2. Yisimo esishubile phakathi kwe-Iran ne-USA;
3. Ukwehla komthamo kawoyela ongahluziwe ezimakethe, iLybia iyisibonelo salokhu;
4. Wukuntenga kwamandla erandi uma liqhathaniswa nedola lase-USA
5. Ingwiji ( backfire) edalwe wukungenelela kukahulumeni uzama ukudambisa ukwenyuka kwentengo kaphethiloli ngokudlule. Ikhefu esilitholile ngalokho kungenelela kukahulumeni, lizolandelwa yimbibizane esizoyithola ngenyanga ezothwasa.
Indaba kaphethiloli isegudwini kulezi zinsuku.
Kusasa ngoLwesihlanu kulindeleke imashi ephikisana nokwenyuka kwawo, ehlelwa yiThe People Against Petrol and Paraffin Price Increases (Pappi) kaMnu Vishvin Reddy othi kuyethusa ukuthi ngo-2010 irandi belilinganiselwa ku-R7 uma liqhathaniswa nedola lase-USA kanti nentengo kaphethiloli ibiyile mali.