BABHIKISHELA UKUKHIPHA IZISU
KUHLELWE ukhukhulelangoqo womcimbi ozothatha ingxenye yosuku lwangoLwesihlanu eGoli njengoba kuyi-International Safe Abortion Day of Action!
Kulo mcimbi ohlelwe yinhlangano ebizwa ngeGlobal Health Strategies namadlelandawonye ayo, kulindelwe bonke abesifazane - kubalwa nezintombi ezisencane - abaphuma kuyo yonke imikhakha, yizinhlangano zezempilo nongqondongqondo balo mkhakha.
Kuzokuba nemashi, wumculo, yizinkulumo ezethulwa ngongoti nokunye okuningi.
Enye yezinhloso zalo mcimbi wukunxusa umnyango wezempilo ukuba wandise izindlela zokwenza kube lula ukukhishwa kwezisu okuphephile kwabesifazane baseNingizimu Afrika.
UNkz Sikelelwa Geya - okwezokuxhumana kubagqugquzeli balo mcimbi futhi okunguyena okhiphe isaziso ngawo - utshele ILANGA ukuthi nakuba kuliqiniso ukuthi sekwenziwa kwaba semthethweni ukukhishwa kwezisu, kepha kunobunzima ababhekana nabo abafuna usizo emnyangweni wezempilo.
Uthe esibalweni sezikhungo zezempilo ezinengqalasizinda yokwenza lokhu, wu-40% kuphela ozinikele ekuhlangabezaneni nezidingo zabafuna usizo.
Imbangela yokuba bangalutholi usizo, uthe imvamisa wukungabi namdlandla kodokotela nabahlengikazi abenqabayo ukusiza ngenxa yonembeza.
Uthe abantu besifazane abemukelekile kulo mcimbi ngabasesigabeni esivumelekile ukwenza ucansi, okusho iminyaka ewu-16. Umkhankaso uzobe uqhutshwa phansi kwesiqubulo esithi, “My Body My Choice” okuwukuthi “Umzimba Wami Nelungelo Lami”.