Uvalo emndenini kanesi obulewe
Bathi bayophumula mhla kwatholakala ababulali bendodakazi yawo
ULALA obenyoni umndeni womhlengikazi waseGamalakhe, ePort Shepstone, obulawe emasontweni amabili edlule, isidumbu sakhe satholakala sigaxeke ezihlahleni endaweni ethandwa yizivakashi, e-Oribi Gorge.
Umndeni kaNkz Nelisiwe “Mu” Cele - ILANGA elibikile ngokutho-lakala kwesidumbu sakhe emasontweni amabili edlule - uthi kawukhululekile njengoba kunemibuzo engaphendulekile ngokubulawa kwendondakazi yawo ngoba kawazi ukuthi ize ibulawa nje, ibixabene nobani noma lowo oyibulele kukhona yini azokwenza kwamanye amalungu alo mndeni.
Uthi wukutholakala kwababulali kuphela okuyowunika ukuphumula nokwamukela isimo sinjengoba sinjalo. Ngaphambi kokuba afihlwe uNkz Cele ngempelasonto edlule, kuke kwaba namahlebezi okuthi ukubulawa kwakhe kuhambisana nesamba semali abesibekile ngoba ezothenga ngaso imoto.
Umndeni kamufi uthi uke wawezwa amahlebezi afana nalawa, kodwa kawunalo ulwazi ukuthi aliqiniso kangakanani, kwazise ama-akhawunti kamufi asebhange kuthiwa avalwe ngamaphoyisa, umndeni kawukwazi ukuwathinta.
ILANGA lixoxe noNkk Babongile Cele, oyisingamama ( step mother) sikamufi, othe njengomndeni babeke konke ezandleni zamaphoyisa, kodwa bayafisa ukuba lolu daba lube nesiphetho.
"Siyafisa ukuba abenzi bobubi okungenani bazinikele emaphoyiseni ukuze sikwazi ukuthola uku- thi yini le umntwana ayebone ngayo baze bambulale.
"Kungenzeka ukuthi icala likithina njengomndeni, mhlawumbe kukhona esibanyathele amakhona (sifisa bavele) ukuze sikwazi ukuxolisa kubona.
"Kuliqiniso elingephikwe ukuthi nathi silala obenyoni ngoba ngempela kasisazi isizathu sokwenzakaliswa kwakhe,” kusho yena.
"Enkonzweni yesikhumbuzo sikaNkz Cele, kuvele ukuthi ushaywe ngento ebuthuntu ekhanda wophela ngaphakathi.
Kuvele nokuthi ubulawa nje, ubenezinyanga eziwu-6 ezithwele ingane yentombazane. Ukubulawa kukaNkz Cele kunyakazise umkhakha wezempilo wonkana KwaZulu-Natal.
UNkk Cele ubonge kakhulu emnyangweni wezempilo nakubo bonke ababesekile kulesi sikhathi sosizi.
“Siyabonga kakhulu kusukela kuDkt Sibongiseni Dhlomo (ungqonqgsohe wezempilo KwaZulu-Natal), yihhovisi lesifunda Ugu, abahlengikazi bonke baseGamalakhe Community Health Centre lapho ebesebenza khona, umphakathi, abazalwane nezihlobo.
"Siyabonga nakulona ILANGA ngelikwenzile ukubika ngalo mshophi osehlele. Njengomndeni siyathobeka ngenxa yokwesekwa esikutholile,” kusho yena.
Okhulumela amaphoyisa KwaZulu-Natal, uLt Colonel Thulani Zwane, uthi okwamanje amaphoyisa asazama ukuthola ukuthi kwenzekeni kumufi kwazise utholakale isidumbu sakhe sesithanda ukonakala.
“Akekho nomuntu oseboshiwe ngokubulawa kwakhe, kodwa amaphoyisa ayalusebenza lolu daba,” kusho uLt Colonel Zwane.