Abe-EFF beza kabi emanyuvesi aseKZN
Sebephuce iSasco amanyuvesi amabili
AMALUNGU eSouth African Students Congress (Sasco) asola uqhekeko nokungabambisani kwiAfrican National Congress (ANC) njengesithiyo esiholele ekutheni le nhlangano yabafundi edlelana ne-ANC ikhale ngaphansi okhethweni, emanyuvesi amabili aKwaZulu-Natal.
ISasco neSouth African Democratic Students Movement (Sadesmo) - eyizinyane leNkatha Freedom Party (IFP) - okuyizona zinhlangano zabafundi ezivame ukuzidlela amahlanga okhethweni, zibhinciselwe nxanye yi-Economic Freedom Fighters Students Command (EFFSC) edle ubhedu eMangosuthu University of Technology (MUT) naseDurban University of Technology (DUT).
I-EFFSC ibikhipha iSasco kuwona womabili la manyuvesi.
Kwenzeka lokhu nje, lezi zinhlangano ezimbili zibambe umoya kwamanye amanyuvesi amabili, okuyi-University of Zululand (Unizul) ne-University of KwaZuluNatal (UKZN) ngenxa yezigi zeEFFSC. E-Unizul nase-UKZN kuqalwa namhlanje ngoLwesine ukuvota.
UNobhala weSasco e-DUT, uMnu Mpumelelo Shange, uthi kabesekwanga wubuholi obuphezulu be-ANC ngesikhathi bekhankasela ukhetho.
“Sizamile ngokusemandleni ethu kwasho ukuthi abaholi bethu kabafiki ukuzoseseka. Bezingekho nezinhlelo esizenza nabo zokuthi sizobambisana kanjani ngaphandle komkhankaso weSiyanqoba.
"Abaholi be-EFF, uNkk Makoti Khawula noMnu Mbuyiseni Ndlozi, bebengapheli lapha eDUT, kodwa abethu kabakaze bafike,” kusho uMnu Shangase.
UMnu Siyabonga Mbandlwa we-Sasco e-Unizul uthi kabanalo uvalo kakhulu kodwa ukuhlukana ngemibono kwamalungu abo kule nyuvesi kwenza bangakhululeki.
“Sisilele kakhulu emkhankaswe-ni ngenxa yokuthi amaqabane amanye afuna ukwenza izinto ngendlela yawo. Kasethukile kakhulu ngoba ngokwezibalo baningi abafundi abathanda uKhongolose,” kusho uMnu Mbandlwa.
UMnu Sphelele Madondo weSa-sco e-UKZN, uthi lisekhona ithemba kubafundi ngomsebenzi wabo bewubuholi.
Utshele ILANGA ukuthi kuyiqiniso elingeke liphikwe ukuthi i-EFFSC ifike ngamandla kodwa akayiboni inqoba.
“Besisohlangothini lwabafundi unyaka wonke, okuyizinkomba zokuthi besiwenza kahle umsebenzi njengoba besikade simele bona kodwa-ke ngeke sazi uma sekuvotiwe,” kusho uMnu Madondo.
Okhulumela i-ANC kwaZuluNatal, uNkk Nomagugu Simelane, uthe uma beceliwe ngabafundi bayabaseka kodwa kabakwazi ukuya enyuvesi ngaphandle kwesicelo.
“Ukukhombana ngeminwe akusasizi, iSasco kumele ibheke ukuthi izinkinga ebezibhekene nabafundi emanyuvesi beyiziphethe kanjani. EMangosuthu isicelile iSasco sathumela uFikile Mbalula, e-UKZN eHoward College, eWestville naseMgungundlovu nakhona sithumele ubuholi obuphezulu,” kusho uNkk Simelane.