ULundi lubashaye emakhanda kolwezindlu
UCHONYWE uphaphe lwegwalagwala wuMnyango wezokuHlaliswa kwabaNtu KwaZulu-Natal ngokuhambisa kwawo ngendlela uhlelo lokwakhiwa kwezindlu ezisezingeni eliphezulu uMasipala wasoLundi ngesikhathi kunomcimbi wezindondo, iGovan Mbeki Awards, ngeledlule, eCoastlands Hotel, eThekwini.
UMasipala wasoLundi uqwaqwade bonke omasipala emkhakheni wokwakhiwa kwezindlu ezindaweni zasemakhaya, ngokohlelo lwakamuva lokwakhiwa kwezindlu ngaphansi kwesizwe sakwaZungu khona oNdini.
Uphinde wahlomula ngenye indondo yokuba nobudlelwano obuhle bokusebenzisana phakathi komnyango nomasipala ngodaba lwezindlu, okuwunika ithikithi lokudlulela esigabeni sokuyoqhudelana nabanye omasipala kuzwelonke ngoLwezi (November) e-East London, e-Eastern Cape.
Okhulumela uMnyango wezokuHlaliswa kwabaNtu KwaZulu-Natal, uMnu uMbulelo Baloyi, uthe baya kulo mqhudelwano kazwelonke bathwele ngeqoma uMasipala wasoLundi ekutheni uzodla umhlanganiso.
“Njengomnyango kusijabulisa kakhulu ukubona uMasipala wasoLundi wenza umsebenzi omuhle kangaka emphakathini, ikakhulukazi ekuqinisekiseni ukuthi abantu bayazithola ngendlela izindlu futhi zibe sesimeni esihle.
“Kulo nyaka umqhudelwano womasipala ubusezingeni eliphezulu kakhulu,” kusho uMnu Baloyi.
IMeya yasoLundi, uMnu uWilson Ntshangase, ithe kuyabathokozisa njengomasipala ukuchonywa lolu phaphe lwegwalagwala.
“Ngikholwa ukuthi kuningi okuhle okwenziwa wumkhandlu, nabo abantu bayazibonela ukuthi sithembekile kubo ngokubanika intuthuko esasiyithembisile. “Indondo kazwelonke sisemathubeni okuba sibuye nayo e-East London. Sithokoza kakhulu ngalokhu kuklonyeliswa, sisazoqhubeka nokwenza kahle emiphakathini yethu,” kusho uMnu Ntshangase ohola lo masipala ngethikithi leNkatha Freedom Party (IFP) oselokhu kwasungulwa uhlelo lomasipala ngo-1996 owasoNdini uphethwe yileli qembu.
Kwale noma i-IFP isihlwithwa inqwaba yomasipala emuva kokhetho lwamhla ka-18 kuNhlaba (May) 2011 emuva kokuba iNational Freedom Party (NFP) kaNkk Zanele Magwaza-Msibi ishade ne-African National Congress (ANC), owasoNdini usale kwi-IFP uphelezelwa ngowaseMsinga. Nawo owaseMsinga usaphethwe yi-IFP.
Abantu bayazibonela ukuthi sithembekile kubo ngokubanika intuthuko esasiyithembisile.