Nasejimini kunemigomo yakhona okumele uyilandele
Nakanjani uma umatasa ejimini uzivocavoca uzojuluka. Akabukeki nhlobo umuntu osuke esejuluke emanzi te, econsa.
UPhashasha Mapekula oyi-Personal Trainer uthi ngesinye isikhathi kuya ngento oyenzayo. Uthi uma wenza into ekujulukisayo njengomuntu ogijimayo nje akufanele agqoke izimpahla ezakhiwe ngecotton ngoba iyawubamba umjuluko, impahla ibe manzi, bese iyasinda emzimbeni.
Kuhle ukugqoka izimpahla ezimunca umswakama esikhumbeni ( moisture-wicking clothing). Yenza isiqiniseko sokuthi ugqoka izimpahla ezakhiwe ngendwangu elula, ekwaziyo ukukushayisa ngomoya futhi eyoma ngokushesha.
Imvamisa izimpahla ezifanele zakhiwe nge- polyester nange- lycra. Abanye besilisa kwesingezansi bagqoka ngisho amabhulukwe e- denim. Kubi lokho ngoba i- denim ingakukhuhla uze uphucuke ngisho isikhumba kwezinye izindawo.
UNGAGQOKI IZIMPAHLA EZINKULU
Usuke uzidalela inkinga nje uma ugqoke izimpahla ezilengayo - zikwenza ungakwazi ukunyakaza ngokukhululeka. Gqoka izimpahla ezikuhlala kahle emzimbeni, hhayi kodwa phela ezikubamba sengathi uzitshelekile. Izimpahla ezakhiwe ngendwa-ngu enwebekayo zikahle
kakhulu. SHIYA UBUCWEBE EKHAYA
Mhlawumbe umuntu osuke eziphihle ngobucwebe ejimini yile nhlobo ethanda ukubukisa noma ukubukwa. Kahle hle, busuke buyaphi ubucwebe ejimini? UPhashasha uthi ubucwebe akufanele nhlobo nje bugqokwe ejimini.
“Bungadala ingozi. Into elengayo kungenzeka ibambeke emshinini, bese uyalimala,” kusho uPhashasha.
Ngaphandle kwalokho, kumele ubuvikele ubucwebe bakho. Nomjuluko futhi kungenzeka ubulimaze ubucwebe bakho. Okugcono bukhumule ubufake kwi- locker.
AKUBONA ABOKUZIVOCAVOCA OPHAQA
Ophaqa akuzona nhlobo izicathulo zokujima, zikhona izicathulo ezifanele, ezakhelwe ukugqokwa uma umuntu ezivocavoca njengamateki. Balungile ophaqa ubagqoke kuma- locker room, uma usuqedile ukuzivocavoca. Kubalulekile ukugqoka isicathulo esifanele ejimini, esikwenza ukhululeke. Ungagqoki futhi iteki elikumpintshayo, lize likudalele ama- bli-sters. Abanye banomkhuba wokuhamba ngamasokisi ejimini - akubukeki lokho, abantu mabangakwenzi. Nawo-ke amateki mawahlanzeke phela, awashwe. OKUNYE OKUSEMQOKA
Uma uya ejimini, ungalikhohlwa ithawula lokusula umjuluko. Mubi umuntu ohambe econsisela umjuluko wakhe yonke indawo.
Kumele ucabangele abanye abantu abasebenzisa le mishini nezinsimbi nawe ozisebenzisayo.
Asikho isidingo sokufaka i- perfume ejimini. Ngaphandle nje kokuthi mhlawumbe ingaphathisa abanye ngekhanda noma ibadalele isicanucanu ngenxa yephunga layo, asikho isidingo sokuyifaka ngoba usuke vele usazojuluka. Mhlawumbe iphathe nje uyifake uma usuqede ukugeza.
Mazihlanzeke izingubo zokujima bakwethu - washa njalo uma uphuma ejimini.
Umjuluko unuka kabi, awukwazi-ke ukuphinda impahla obuyingqoke ngayizolo. Bakhona abanomkhuba wokuphinda izimpahla - ubezwa ngokunuka isimuncwana nje.
UPhashasha uthi ungalokothi ufake i- makeup uma uzivocavoca. Uma uyifakile usuke usuvale izimbobo esikhunjeni ukuba zingakwazi ukukhipha udoti, bese kunqwabelana ngaphakathi, kukudalele inkinga yesikhumba.