BAZOZITIKA NGEDILI LOMCULO NEMISEBENZI YEZANDLA ECLERMONT
UZOKWETHULA into eyehlukile ngeSonto eKK Shell Garage, eClermont, umhleli micimbi waKwaDabeka, uKwazikwakhe “StixZet‚” Zulu (43), ongomunye wabantu abahamba phambili kwezobuciko kuleli lokishi.
U-StixZet, ongumnikazi wenkampani iStixZet Outdoors, uthi ngeSonto kuzoqala umcimbi ozoba khona njalo ngezimpelasonto, lapho osomabhizinisi bezoba nethuba lokukhangisa ngemisebenzi yabo, kushetshwe nomculo owahlukene.
“Lapha sizokwamukela osomabhizinisi abehlukene kubalwa nalabo abahweba ngemisebenzi yezandla. Simeme namaciko nanoma ngubani onethalente afisa libonwe wumphakathi bafike bazokhangisa kule makethe esizobe siyivulile.
“Inhloso wukuba bakwazi ukuziveza ngemisebenzi yezandla, amabhizinisi nanoma yini abayenzayo ukuze bakwazi ukuthola amakhasimende,” kusho yena.
Uthi lo mbono umfikele ngemuva kokuba usomabhizinisi wasendaweni, uNjabulo Lindo Ntombela, emnikeze le ndawo wathi makayisebenzise mahhala.
“Lo somabhizinisi nguye ozophinde aqinisekise ukuthi kubakhona umculo,” kusho yena.
Uthi kule ndawo kuzobe kungenwa mahhala, kanti abafisa ukuzokhangisa ngemisebenzi yabo yezandla namakhono abo, uthi bangathintana naye babekise isikhala.
“Lokhu kuhlangana kwethu sizokubiza ngeSunday Chillas kanti kuzokwenzeka njalo ngeSonto. Kuzoba khona nabantu abadayisa ukudla okwahlukene kanti kuyona futhi le ndawo kuphinde kube noshisanyama,” kusho uStixZet oke waba semehlweni abathandi bomculo ngengoma abepikwe kuyona nguDJ X ethi “Umona”, ebidlala eziteshini ezahlukene zikamabonakude, okubalwa kuzona neTrace Urban.
Uthi kakubona abantu baKwaDabeka naseClermont kuphela abavumelekile kodwa nabasezindaweni eziseduze kwaleli lokishi bamukelekile.
Uqhube wathi utholakala ezinkundleni zokuxhumana kuFacebook no-Instagram ngaphansi kwegama elithi: Stixzetoutdoors.
nonhlakaniphos@ilanganews. co.za