ABANEME ABASIKI BENGQEPHU NGE-DFF
ILINGANISELWA ku-R40 million imali esifakwe wuMasipala weTheku esikhwameni sokuxhasa umkhakha wezemfashini usebenzisa iDurban Fashion Fair njengesizinda sokuqhakambisa ikhono elivutshelwe KwaZulu-Natal. Lokhu kuvezwe yiSekelameya leTheku, uNkk Fawzia Peer, ngoMgqibelo ebusuku emcimbini wokuklomelisa abasiki bengqephu obuseNkosi Albert Luthuli International Convention Centre (ICC), eThekwini. UNkk Peer uthe lolu xhaso selushintshe impilo yabasiki bengqephu ababalelwa ku-800 kusukela iDFF yethulwe okokuqala eminyakeni ewu-6 eyedlule.
Uthe uthokozile kakhulu ngalolu xhaso, ikakhulukazi ngoba nayo iDFF ibukeka idlondlobala ngamandla njengoba kumanje isiheha nabasiki abaphuma kwamanye amazwe ase-Afrika.
“Kakungabazeki ukuthi imfashini ingomunye wemikhakha ebalulekile uma kukhulunywa ngezomnotho, yingakho nathi senza okusemandleni ukuyeseka,” kusho yena.
Mayelana neDFF, uthi kuningi okuhlonyulwe ngabasiki bengqephu kulolu hlelo njengoba abanye babo kumanje sebeke baba yingxenye yokuyobukisa emazweni aphesheya, abanye sebenezitolo namagama ahlonishwayo emphakathini.
Uveze ukuthi bewumasipala basazoqhubeka nokulweseka lolu hlelo ngokubambisana nabanye abaxhasi.
Yize kunjalo, kayeneme enye ingxenye yabasiki bengqephu ebibukisa kulo nyaka njengoba iningi lithi lisale nemibuzo engaphenduleki ngenxa yempatho ebandayo abathi bayithole kubahleli, lazwakalisa nokungenami ngokuwina komsiko emunxeni obubhekwe kakhulu, iDesigner Of The Year.
ILANGA likhulume nalaba basiki, abacele ukuba amagama abo angavezwa ngoba besaba ukuthi hleze ngokuzayo bakhishwe inyumbazane, bathe kabeneme ngendlela abaphathwa ngayo - ikakhulukazi labo abasuke benezitende zombukiso. Bathi yize lolu hlelo - oluthathe izinsuku ezine - kuthiwa lungolwabo, kodwa bona bazizwa benganakiwe kangako, kubhekelelwa izicukuthwane nosaziwayo.
“Siyavuma ukuthi siyalithola ithuba lokwaziwa nokuzidayisa emphakathini kodwa kuningi okwenzekayo ekusithekeni okungasijabulisi. Ukuba kasikho thina njengabasiki, ngabe nalo mcimbi kawukho.
“Ngisho okuya ngasethunjini kumele sizibhekelele thina nalabo abasuke besisiza kodwa sibone izicukuthwane ziphuma zingena endaweni yomntakabani, thina singanakiwe,” kusho omunye wabasiki bengqephu obekhangisa ngemisiko yakhe.
Omunye ukhale ngokungaqondi ukuthi ukhethwe kanjani umsiko ohlwithe iDurban Designer of the Year.
“Miningi imisiko edlisele ogageni lo owinile. Ngisho eye- mentees kukhona ebingcono kunawo, yingakho sibaningi esingaqondi ukuthi kanti amajaji abebhekani lena eyenze wawina.
“Mabasicacisele ukuthi uwine ngenxa yeminyaka (umnikazi wawo) anayo eyingxenye yeDFF noma ngamagalelo akhe angaphandle ngoba uma kukhulunywa ngezingubo abebukisa ngazo, cha baningi abamshayile.
“I-DFF kuhlale kuthiwa ngeyokufukula intsha ngakho mayiqhubeke nalowo mgomo, ingabi nokwenzelela,” kusho omunye umsiki. Imizamo yokuthola uSindi Shangase, oyisikhulu kwiDFF, kayiphumelelanga, ucingo lwakhe beluvaliwe. Uthunyeliwe umyalezo kodwa kuze kwashaya isikhathi sokuloba engabuyelanga kuleli phephandaba.
Ngisho okuya ngasethunjini siyazibhekelela thina nalabo abasuke besisiza.