Kuthikameza namabhizinisi ukumiswa kwezitimela
UMKHUBA omubi wokucekela phansi izitimela osuwandile eNtshonalanga Koloni naseGauteng, sewukapakele nakuleli likaMthaniya, njengoba abagibeli bazo beshise impahla yePassenger Rail Agency of South Africa (Prasa), neyezisebenzi zale nkampani eMlazi ngeledlule.
Ngenxa yalesi sehlo, iPrasa imise ukusebenza kwezitimela kuleli lokishi nakwamanye akhele iTheku, osekulimaze abagibeli ngoba phela kuphoqe ukuba bahambe ngamatekisi namabhasi, okuyizinqola zokuthutha ezibiza ngokuthe xaxa kunezitimela.
Ukumiswa kwezitimela sekuthikameze namabhizinisi amancane njengoba labo abadayisa eziteshini nakuzona izitimela, bengakwazi ukudayisa impahla yabo kulezi zindawo ngoba bengekho abagibeli.
Imibiko ngokwenzeka ngesikhathi sesigameko, ikhomba ukuthi abagibeli benze lo monakalo ngoba bedinwe wukungafiki ngesikhathi kwezitimela, okwenza ukuba bafike sekwedlule isikhathi emsebenzini.
Ukumisa ukusebenza kwezitimela khona kubalimazile abagibeli, kodwa bekufanele zimiswe ukuze abenzi bobubi bezofunda isifundo sokuthi abakwenzile kunomphumela ongemuhle.
Yebo, ukungasigcini isikhathi kwezinqola zokuhamba kuyanenga, kodwa kufanele sikusho lokhu; ukushisa izitimela, okuyimpahla kahulumeni ethengwa ngemali eshisiwe yabakhokhi bentela, kuwubuwula obuphindiwe. Ukwenza lokhu kakunamqondo sampela, futhi kukhomba ukungahleleki ngomqondo kwabenzi bomonakalo.
Empeleni kufana ncamashi nokuzigwaza ngowakho ngoba phela kwenza ukuba isibalo sezitimela ezisebenzayo endaweni sinciphe, isimo sibe sibi kakhulu kunakuqala. Abantu abamoshekayo kulesi simo ngabagibeli uqobo. Kujwayelekile kuleli ukuba uma izinto zingahambi kahle, kusolwe uhulumeni, abantu bangazibheki bona ukuthi yini abayenzayo ukulungisa isimo nokuthuthukisa izwe labo.
Kunesihlava ezweni, sokuba abantu bangaqali ngokufuna isixazululo ezinkingeni esinazo, kodwa bajahe ukufuna ukusebenzisa udlame, okwenza isimo sibe sibi kakhulu kunakuqala.
Kanjalo siyathanda ukulandela okubi okwenzeka kwezinye izindawo, njengoba manje abantu baseThekwini sebekopele ubuxhwanguxhwangu bokushisa izitimela okudume kwezinye izifundazwe.
Udlame olungenamqondo ngeke luphele kuleli uma izakhamizi ziqhubeka nokusonga izandla zingabakhuzi labo abenza okubi, futhi zingasebenzisani nabomthetho ukulwa nobugebengu.
Njengoba sihlale sisho kule ngosi, kufanele uqine umthetho ezweni, ukuze izigebengu zazi ukuthi uma ziwephula ziyothola izigwebo ezizifanele. Ngeke kulunge lutho kuleli lizwe uma siqhubeka nokuthethelela abantu abephula umthetho. Mawusebenze umthetho, bajeze abenza okuphambene nobulungiswa.