SIHLUKUNYEZWA YI-PRASA NGEZITIMELA
MHLELI: Ngicela ukubeka umbono wami ngenhloso yokuveza isihluku sabaphathi bakwaPrasa la kwelikaMthaniya. Mangiqale ngokuphawula ukuthi kangikuvuni ukucekelwa phansi kwempahla ngenxa yokunganeliseki ngezidingo.
Izikhulu ezimbili esengike ngazizwa zikhulumela iPrasa, zibalula ukuthi izitimela sezizindala, ungafunga ukuthi ziyaziqhenya ngalokho. Ngiyavuma impela nami ukuthi sezizindala zona, kodwa inkinga enginayo wukuthi kazisukanga zaba zindala nje, ziguge kancane kancane.
Ngalesi sikhathi ziguga, bebengaboni yini abakwaPrasa ukuthi kufanele kuthengwe ezinye? Kuyaziwa ukuthi izinto ezingamathuluzi ziyaguga ngokuhamba kwesikhathi, ngaleyo ndlela ngichaza ukuthi izikhulu mazingalokhu zithi izitimela sezindala ngoba bekufanele zithengwe, kwazise bayakhokha abazigibelayo.
Kafushane nje, ubehlulile umsebenzi abawuqashelwe laba abaqondene nokuthengwa kwezitimela, badlulwa ngisho nangumalume wami ongafundanga into etheni, kodwa uyazi ukuthi izinqola zakhe athutha ngazo umphakathi ziguga nini. Ngaleyo ndlela, uyazi ukuthi uzithenga nini ezizongena esikhundleni zazo. Abantu abaqashwa laphaya, baqashwa ngoba bewufundele umsebenzi, kodwa behluleke bancama ukuwenza. Bayizehluleki nje qha.
Ngokwami, behluleke kabili nangaphezulu. Okokuqala, behlulwe wukuthenga izitimela ngesikhathi, okwesibili yilokhu kokuthatha isinqumo esinonya ngalolu hlobo kubantu abaswele (sokumisa izitimela) abanye bayizisulu zomlando waleli lizwe lethu.
Okunye okokungakwazi ukuhlinzeka ngezokuphepha ezisezingeni eliphezulu, abagibeli babanjwa inkunzi mihla namalanga ezitimeleni futhi zigcwala ngokweqile, abagibeli baze balenge ngaphandle. Izitimela zihlale zishiywa yisikhathi mihla le. Nakujantshi sekwenile futhi kungcolile. Ukugibela izitimela kuyisihluku nje kukodwa, ikakhulukazi kwabesifazane.
Lesi sinqumo (sokumisa izitimela) sikhombisa nokungawazi umlando waleli lizwe esiphila kulo. Ngeke ngimangale uma ngingezwa ukuthi ezinye zezikhulu zinezinqola zazo embonini yezokuthutha, okuzinika umhlomulo uma zimisa izitimela. Lezi ziphathimandla zakwaPrasa ziwulolu hlobo lwabantu oluthi uma lusuthi bese lucabanga ukuthi bonke abantu basuthi.
Le nto eziyenzayo iwukuxhaphaza amandla ezinikezwe wona. Okunye okungimangalisayo, wukuthula cwaka kwalezi zinhlangano ezihlala ziziqhayisa ngokulwela amalungelo abantu nezisebenzi. Lesi simo sinomthelela ongemuhle ezimpilweni zabagibeli, yizisebenzi nasemnothweni. Mababuyise izitimela, balungise amaphutha abo.