Bayaziqhenya ngempumelelo yabo
Benza imikhiqizo yesikhumba
BAYAZIQHENYA ngokudlondlobala kwebhizinisi labo njengoba sebekwazi nokusiza abanye besifazane ukuba bakwazi ukuthola amasentshana ngokudayisa imikhiqizo yabo osomabhizinisi ababili besifazane baseThekwini. UNkk Andile Hlongwa (35) noNkk Zanini Sibeko (41), abangabangani baseWestville, bangabanikazi be-On Point Investment Group, eyenza imikhiqizo yokunakekela isikhumba engenawo amakhemikhali, ebizwa ngeMy Opulence. Bathi baqale leli bhizinisi ngendlela engajwayelekile ngokuthi benze imikhiqizo bangayidayisi, kepha baqale ngokuyinika amalungu omndeni, abangani nomakhelwane mahhala ukuze bayisebenzise besebebuyela kubona nemiphumela. Lokhu kubasize kakhulu ngokuhamba kwesikhathi njengoba uNkk Hlongwa ethi ibhizinisi labo lidlondlobale laba namakhasimende amaningi ngenxa yokuthi abantu abasebenzisa imikhiqizo yabo bebetshela abanye ngemiphumela emihle abebeyithola. “Kasidinganga nokuthi size sikhangise kakhulu ngalo, kodwa kube ngamakhasimende ethu abetshela abanye abantu ukuthi imikhi- qizo yethu iyabasebenzela,” kusho yena.
Uthi baqale benza imikhiqizo emibili kuphela, bebenza amaunit awu-35 ngenyanga, kodwa manje sebenza aphakathi kuka2 000 no-3 000 ngenyanga.
“Imikhiqizo yethu siyenza ngezandla zethu, sisebenzisa izithako ezingenabungozi, okusho ukuthi nezingane zingayisebenzisa. Umkhiqizo esisebenzela kakhulu kuwona nesiwusebenzisa kuyona yonke imikhiqizo yethu, yi- shea butter esiyithenga eGhana ingafakwe lutho.
“Emuva kwalokho sifaka izithako zethu ezahlukene okuhlanganisa nama- essential oil. Lokhu sikwenza ngokungesabi ngoba uNkk Sibeko ukufundele ukusebenza ngesikhumba futhi useneminyaka ewu-15 ekulo mkhakha,” kusho uNkk Hlongwa.
Manje sebenezinhlobo eziwu-9 zemikhiqizo enakekela isikhumba nezinwele okuhlanganisa insipho, wo-oyela bokugcoba, okokugcoba umzimba, okulwa neeczema nokunye okuningi.
“Sinabantu abawu-18 abasabalalisa imikhiqizo yethu esibaqeqeshile, okungabesifazane. Ukuziqhenya kwethu ngokuthi imikhiqizo yethu ngeyabesifazane, yakhiwe ngabesifazane, kubuye kusidalele izingqinamba ezithile.
“Kuyimanje sizama izindlela zokulungisa lokho ngoba sinama- khasimende esilisa amaningi asebenzisa imikhiqizo yethu ahlala esikhalela ngokuthi masingabavaleli ngaphandle. Ngesikhathi sisasungula le mikhiqizo, sicabange sangafika lapho sesikhona manje. Okusezinhlelweni zethu wukuthi kungabi khona amakhasimende esiwavalela ngaphandle,” kusho yena.
UNkk Hlongwa uthi basungule i-On Point ngenhloso yokwenza izinto eziningi ngaphansi kwayo, kodwa kube sekuchuma le mikhiqizo, okubenze bagxila kuyona.
“Sisebenza kakhulu ngezinkundla zokuxhumana njengoba sinamakhasimende iNingizimu Afrika yonkana. Inhloso yethu enkulu manje wukuvula isitolo nokusebenzisana nama- pharmacy abantu abamnyama ukuba adayise imikhiqizo yethu,” kusho yena.
Yize sebenabesifazane abawu-18 abangaphansi kwabo kepha bathi isifiso sabo wukuba sande isibalo sabazodayisa imikhiqizo yabo.
Abakwazi ukudayisa imikhiqizo yabo, kuba ngasebeke bayisebenzisa abayincomayo ngoba uNkk Hlongwa ethi bakholwa wukuthi kumele uyazi njengoba uzazi ukuthi isebenza kanjani.
Uthi bayazama nokubuyisela emiphakathini ngokunikezela ngemikhiqizo yabo mahhala ezinganeni ezincane ezihlaselwa yisifo sesikhumba i- eczema.