Ufuna kucindezelwe iChiefs nePirates
USIHLALO weMaritzburg United, uFarook “Ntshebe” Kadodia, ugqugquzela abalandeli bakanobhutshuzwayo baKwaZulu-Natal ukuba bacindezele wonke amakilabhu athathwa njengamakhulu ebholeni laseNingizimu Afrika.
ITeam of Choice igile izimanga emcimbini wokuklomelisa abadlali abenze kahle weKZN Sports Award ngoLwesibili ebusuku eNkosi Albert Luthuli International Convention Centre (ICC), eThekwini.
UFadlu Davids ongumqeqeshi wayo uqokwe njengovelele, kwathi yona yaklonyeliswa njengekilabhu yonyaka.
IMaritzburg igile izimanga ngesizini edlule ifinyelela kowamanqamu weNedbank Cup egcine ihlulwa kuwona yiFree State Stars ngo-1-0 eCape Town.
Iphinde yasonga isizini ikwi- top 8 okuyinto engajwayelekile kule kilabhu ezinze eMgungundlovu.
UKadodia engxoxweni abe nayo naleli phephandaba izolo ngoLwesithathu ekuseni, uhlohle abalandeli bakulesi sifundazwe ukuba bacindezele iKaizer Chiefs, i-Orlando Pirates neMamelodi Sundowns.
“Ngijabule ngemiphumela ezuzwe yikilabhu kodwa ngikholwa wukuthi amakilabhu alapha ekhaya angenza kangcono uma engathola ukwesekwa esifundazweni adabuka kusona.
"Uma udlala neChiefs, iPirates kumbe neSundowns ekhaya kuyaye kube sengathi uhambile ngenxa yokuthi abantu basekhaya bathanda kakhulu amakilabhu okuhamba.
“Kufanele uphele lo mkhuba, abantu bakulesi sifundazwe mabawacindezele la makilabhu uma elapha ekhaya.
Uma nje kungenzeka kanjalo ngikholwa wukuthi amakilabhu ethu angenza kahle ngoba lesi sifundazwe yisona esinabantu abaningi kunezinye,” kusho uKadodia.
Uthi kuzofanele isebenze ngokuphindiwe ikilabhu yakhe uma ifuna ukuthola i- top 8 ngale sizini.
“Le sizini izokuba nzima uma ubheka ukuvuka kwamakilabhu abedonsa kanzima ngesizini edlule kubalwa iBidvest Wits neSuperSport United.
"La makilabhu asebuyele ezindaweni ajwayele ukuhlala kuzona.
"Kuzofanele sisebenze ngokwengeziwe ngale sizini ngoba kuzokuba nzima,” kusho uKadodia.