ISICELO SIKA-BENNI NGE-MTN8
UMQEQESHI weCape Town City, uBenni McCarthy, wenza isicelo kubalandeli bakanobhutshuzwayo baKwaZulu-Natal ngaphambi komdlalo omqoka wezakhe. ICity izoshukana neSuperSport United kowamanqamu weMTN8 ngoMgqibelo ngo19h00 eMoses Mabhida Stadium, eThekwini. Lo mdlalo uyimpinda njengoba la makilabhu etholane kowamanqamu walo mqhudelwano ngesizini edlule enkundleni efanayo. Kugcine kunqobe iSuperSport. Kulindeleke ukuba uhehe izinkumbi zabalandeli njengoba kuyiwona kuphela umdlalo omkhulu ozogijinywa eNingizimu Afrika ngale mpelasonto.
UMcCarthy, obengaconsi phansi kubathandi bebhola bakuleli esagijima eqenjini lesizwe iBafana Bafana, wenze isicelo kubalandeli bebhola baKwaZulu-Natal.
“Ngiyazi ukuthi bakhona abalandeli bethu abazokube besuka eKapa ukuzoseseka kodwa ngeke bayigcwalise le nkundla. Ngakho-ke ngiyazicelela kubantu baKwaZulu-Natal ukuba baphume ngobuningi babo bazokweseka thina. Ngicela bahambe nathi kulokhu, basisize siwunqobe lo mqhudelwano.
“Kuzokuba buhlungu ngokuphindiwe uma iSuperSport ingasiphinda nakule sizini. Empeleni kuzodaleka
umonakalo
omkhulu ongasihlukumeza isizini yonke. Ngendlela abadlali bami abayifuna ngayo le nkomishi uyabona ukuthi imiqondo yabo bayigxilise kuyona ngokuphelele.
“Sizokulwa kulo mdlalo kodwa impi yethu ingaba lula uma abalandeli baKwaZuluNatal bengahamba nathi kulokhu. Ngiyaphinda ngiyabacela baphume ngobuningi babo bazoseseka,” kucela uMcCarthy.
UKaitano Tembo ololonga iSuperSport, uthi lo mqhudelwano kawukho ngaye njengoba kubhekwe ukuba azibeke emlandweni wokunqoba inkomishi okokuqala ngqa engumqeqeshi ozimele.
“Le nto kayikho ngami, imayelana nekilabhu. Kungangijabulisa ukuba semlandweni kodwa lokho kakukho mqoka kangako kimina, esikudingayo nje wukunqobela ikilabhu le nkomishi. Engingakusho wukuthi sizokulwa ukuze sivikele isicoco sethu, ngeke sivume ukuphisana ngaso kalula,” kusho uTembo.
IPremier Soccer League (PSL) inxusa abalandeli ukuba baqhubeke nokuthenga amathikithi kusenesikhathi kwazise asekhona.
Abiza kusuka ku-R40 awabadala, kube ngu-R15 awezingane ezineminyaka yobudala engaphansi kuka-12. Atholakala eTicketpro, ezitolo zakwaCNA, Postnet, Edgars nakwaJet. Ayatholakala futhi online kwiwebsite ethi: www.ticketpros.co. za.