BALWELA UKUZIBHALELA UMLANDO NGE-MTN8
ILWELA ukungena emlandweni i S u p e r- Sport United ngokunqoba isicoco seMTN8 kulandelana okuzokwenza bayigcine unomphela inkomishi yalesi sicoco abazosibanga neCape Town City emdlalweni ozokuba ngoMgqibelo ngo-19h00 eMoses Mabhida Stadium, eThekwini. URonwen Williams ongunozinti wokuqina weSuperSport, utshele ILANGA ukuthi lo mdlalo bawuhlelele ukuwuqeda emizuzwini engu-90, ungadluleli kwi- extra time nakumaphenathi akhale ngokuthi kuwukhandla kakhulu umzimba ukuba kuwona. ISuperSport iyasivikela lesi sicoco njengoba isinqobe nyakenye ihlula yona iCity eThekwini. “Indebe yeNedbank Cup sakwazi ukuyigcina unomphela. Manje sekuyisikhathi sokwenza okufanayo ngeMTN8 ngokuba siyinqobe iminyaka ilandelana. Siwuhlelele kahle lo mdlalo futhi siwulungele ngokuphelele,” kusho lo nozinti ngale kilabhu enomlando omuhle njengoba kuyiyona kuphela ephethe irekhodi lokunqoba i-Absa Premiership amahlandla amathathu amasizini elandelana. Uqhube ngokuthi kakubakhathazi ukuthi iCity ibavulise isizini ngesibhaxu kwiligi ezeseka ngokuthi bebesafundana kahle nomqeqeshi wabo, uKaitano Tembo. “Sigabe ngoBongani Khumalo, uMorgan Gould noClayton Daniels abahlale befaka umdlandla kubona bonke abanye abadlali. Okuhle wukuthi nesisu sethu siqine kahle njengoba sigabe ngoLetsholonyane (uReneilwe) noFurman (uDean),” kusho uWilliams ezakhe ezigabe ngoBradley Grobler phambili. Esiswini abadlali beSuperSport kuzomele bagade uTeko Modise, uThabo Nodada no-Ayanda Patosi abalikhulumisayo ibhola.
Omunye umbiko ngeMTN8 ekhasini 41