USEJAHE UKUYONCELA ULWAZI KUMGADLI WOSUTHU
Ebika eseMelrose Arch, eGauteng
UFUNA ukuncela ulwazi kuSiyabonga “Bhele” Nomvethe ongumgadli wamaZulu FC umdlali waseShowe oqokelwe ukuyozama inhlanhla kule kilabhu yaKwaZulu-Natal.
AbakwaNedbank, izolo ngoLwesithathu emini bebenomcimbi eMelrose Arch, eGauteng, lapho abadlali beqembu iNedbank Ke Yona bebezovezela emphakathini amakilabhu abazozama kuwona inhlanhla inyanga yonke.
ULwazi “Mugabe” Mgwaba (19) ongumgadli odabuka oHologo, eShowe, KwaZulu-Natal uqokwe ukuzozama inhlanhla kumaZulu FC. Lo mdlali uthi kumjabulisile ukuqokwa ukuyojima nekilabhu yangakubo futhi kuzokwenza impilo yakhe ibe lula.
“Kungijabulisile ukuqokwa ukuyozama inhlanhla ekilabhini yangasekhaya. AmaZulu ngawathanda kudala ngenxa yokuhle- leka kwawo. Impilo yami izokuba lula njengoba ngizokuba ngasekhaya, uma nginenkinga kuzokuba lula ukuthi ngixhumane nomndeni wami.
“Nokho engikujahe kunakho konke wukuyoncela ulwazi kuNomvethe ozothatha umhlalaphansi ngoZibandlela (December). Ungumgadli oseqophelweni eliphezulu, ngingajabula kabi uma ngingancela ulwazi ngaphambi kokuba ahambe. Ngaphandle kwakhe, kukhona uMabhudi Khenyeza naye onesipiliyoni kanti noAyanda Dlamini ololonga isikimu seMultiChoice Diski Challenge kuningi engizokufu- nda kuyena ngoba naye ubengumgadli,” kusho uMgwaba.
Uthi unethemba lokuthi abadlali boSuthu bazomamukela ngezandla ezimhlophe. Uhlu namakilabhu abadlali beNedbank Ke Yona Team abazoya kuwona lumi kanje: Lwazi Mgwaba (AmaZulu), Maluleke Mathonsi (SuperSport United), Mzikayise Williams (Cape Town City), Nkanyiso Nene (Kaizer Chiefs), Sbonelo Majozi (Polokwane City), Sipho Sibiya (Baroka FC), Tebogo Mokgotsi (Black Leopards), Xolela Bonxa (Lamontville Golden Arrows), Asivile Tom (Highlands Park), Axolile Kapo (Maritzburg United), Buyelekhaya Velelwandle (Bloemfontein Celtic), Cameron Paulse (Orlando Pirates), Karabo Mookamedi (Mamelodi Sundowns), Lesley Pietesen (Free State Stars) noLunathi Mdatyulwa (Chippa United).