Iyaveva inyanga "ebanjiswe ibhantshi"
Ichithe izindodla yondla ingane engayizali
IYAVEVA yintukuthelo inyanga-mfundisi yaseThekwini echithe izindodla zemali yondla ingane yomfana okuvele ngoLwesibili eNkantolo yeMantshi eMlazi ukuthi kakusiyona eyayo, ibibanjiswe ibhantshi.
UMnu Nhlanhla Cele, oyinyanga-mfundisi edumile eThekwini, usenqume ukubopha owesifazane wakwa-N, eMlazi - esingeke simdalule igama lakhe ukuvikela ingane - ongunina wengane, ngenxa yokumondlisa ingane okungeyona eyakhe iminyaka ewu-7.
Ekhuluma neLANGA uMnu Cele, obebuya enkantolo, uthi ingane ubeyondla ngo-R2 000 ngenyanga.
“Unina wengane ubengalenzi iphutha lokungayilandi imali. Uma kuke kwenzeka iphutha ngakhohlwa ukuyishiya ekhaya, bekuthi makangidle angifele. Bengingenankinga nokondla ingane ngoba bengazi ukuthi ngeyami, ngiyazondla zonke izingane zami,” kusho yena.
Uthi uqale ukuqaphela ukuthi kukhona okushaya amanzi ngesikhathi unina wengane eqala ukumncikiselela ukuba ivakashe kubo njengezinye izingane zakhe.
Uma kwenzekile wavuma ukuba ivakashe, uthi ubengafuni ukuba ilale kubo, ibihlala isikhathi esincane ayilande.
“Ngonyaka ophelile ngenzele zonke izingane zami umsebenzi wokuzibika kubantu abadala, unina wale ngane ubemanqika ukuyiletha ekhaya ngemuva kokuba ngimtshele ukuthi ngizozenzela umsebenzi.
“Ubengafuni ukuletha ingane ekhaya kwaze kwaqala umcimbi ngoLwesihlanu, kwashiswa impepho. Uze wayiletha ngakusasa ekuseni umcimbi usuqalile, nakhona kayihlalanga isikhathi eside,” kusho uMnu Cele.
Uthi indaba yonakale ekuqaleni kwalo nyaka ngesikhathi egula elaliswa esibhedlela, wangakwazi ukukhipha imali yesondlo sengane inyanga eyodwa.
Uthi unina wengane ube esethatha isinqumo sokuyombophela isondlo.
“Sifike enkantolo ngabe sengithola ithuba lokuba ngicele ukuba kuqale kuhlolwe ukuthi ingane ngeyami ngempela yini ngenxa yezinto ebezenziwa ngunina, ezenze zaqina izinsolo ebenginazo ngayo. Ngenze zonke izinhlelo nodokotela, ngazikhokhela zonke izi- ndleko zokuhlolwa kwamagazi, wanikwa nosuku obekumele abuye ngalo nengane sekuyothathwa amagazi. Ngosuku obekumele siyohlolwa ngalo nengane, unina akazange ayilethe, ucingo lwakhe ubeluvalile,” kusho yena.
Uthi kuze kwasiza ukuba inkantolo imphoqe ukuba ayilethe ingane kuyohlolwa amagazi.
Uthi okumhlukumeza kakhulu kukho konke lokhu, wukuthi unina wale ngane ubeyifuna ngodli imali kuyena, ngisho eseyikhiphile le abavumelane ngayo.
“Ngifuna angikhokhele yonke imali yami ebengondla ngayo le ngane, abuyise nemali yami yenhlawulo engayikhokha,” kusho uMnu Cele othe usazobala ukuthi ngabe yimalini ayifunayo.
ILANGA lishayele unina wengane oveze ukuthi akagculisekile ngemiphumela yolibofuzo. Uthe udaba uzoludlulisela phambili ngoba uyazi ukuthi ingane ngekaMnu Cele.
ILANGA likhulume nommeli kaMnu Cele, uMnu Trevor Nkosi, okuqinisekisile ukuthi baphezu kwezinhlelo zokuthathela unina wengane izinyathelo zomthetho.
“Sizobala zonke izindlelo kuhlanganisa nemali yokuhlawula ingane eyakhokhwa nguMnu Cele ukuze ezoyibuyisa yonke,” kusho uMnu Nkosi.
Uthi unina wengane umthumelele imiqhafazo esola yena ngo- kuthi uthenge imantshi ukuze izovuna uMnu Cele ngomphumela wolibofuzo.
“Kungimangalisile lokho ngoba imantshi kayihlangene nokuhlolwa kwamagazi,” kusho uMnu Nkosi.