UBULALE UMQASHI EFUNA IHOLO
ZISABAMBE ongezansi izisebenzi zenkampani yonogada, iBlack Harks, eseSpringfields, eThekwini, emuva kokuba uzakwabo ebulale umqashi wazo phambi kwazo, ngoLwesibili, kubangwa ukuthi uyamxosha yize engamholelile.
ILANGA lithole ukuthi umsolwa (31) - esiligodlile igama lakhe aze avele enkantolo, ushaye wabulala umqashi wakhe, uMnu Vincent Moodley, ngoba eseqashe omunye umuntu esikhaleni sakhe, ekubeni engamholelile.
UMnu Sizwe Mkhize, oyisisebenzi sale nkampani, obekhona kwenzeka lesi sigameko, utshele ILANGA ukuthi umsolwa ufike emsebenzini njengenjwayelo ngoLwesibili ekuseni eyosebenza, wafica sekuqashwe omunye unogada engatshelwanga lutho.
Lo nogada omusha ushiywe nguMnu Moodley umsolwa engakafiki emsebenzini.
Umufi ubeshiye umyalezo kulo nogada omusha ukuthi atshele umsolwa ukuba amfundise umsebenzi ngoba yena ngeke esasebenza kule nkampani, okumcasule kakhulu (umsolwa).
Ngokusho kukaMnu Mkhize, umsolwa utshele unogada omusha ukuthi ngeke akwenze lokho atshelwa khona ngenxa yokuthi ubengalitholile iholo lakhe langenyanga edlule.
Kuthiwa umyalele ukuba abuyele kumqashi wabo amtshele lokho.
Uthi nebala unogada umfonele uMnu Moodley wamazisa ukuthi umsolwa ukhala ngeholo lakhe, uthi ngeke amfundise umsebenzi.
UMnu Moodley kuthiwa akachithanga sikhathi, ufike ngokuphazima kweso endaweni yokusebenza, wafica umsolwa ekwelinye igumbi ekhumula umfaniswano womsebenzi, elungiselela ukuhamba.
Baqale ngokuhilizisana, uMnu Moodley esola umsolwa ngokungayihloniphi into amtshela yona. Kuthiwa umsolwa uthukuthele wagana unwabu, wadonsa induku ebiseduze kwakhe washaya ngayo uMnu Moodley.
Ngokusho kwesinye sezisebenzi ebesikhona kwenzeka lokhu, esicele ukungadalulwa, umsolwa ushaye uMnu Moodley wathulela endaweni yesigameko.
Kuthiwa eseqedile ukumshaya, uqonde kuzakwabo omusha obezoqala ukusebenza, wamazisa ukuthi usemshaye waze wambulala umqashi wakhe ngenxa yokuthi ubengafuni ukumkhokhela.
Kuthiwa umsolwa uqede ukwenza lokhu wahlala elinde amaphoyisa ukuba ambophe.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa abophe umsolwa oyedwa oficwe endaweni yesigameko. Uzovela namhlanje eNkantolo yeMantshi, eThekwini ngecala lokubulala.