IKHUZA IBUYA I-ANA EYASHAYWA NGESITHENDE

IKHUZA ibuya i-Annual National Assessment (ANA) echithwe yizinyunyana zothisha eminyakeni edlule ngenxa yokungagculiseki ngendlela ebisingethwe ngayo.

Umqondisi walolu hlelo - lokubhalwa kwezivivinyo olubheka ukuthi abafundi bayathuthuka yini ezilimini nakwiMaths - eMnyangweni wezeMfundo KwaZulu-Natal, uMnu Bongani Mjoli, uthi mhla ka-15 kuya kumhla ka-19 kuyona le nyanga, kuzobhaliswa izikole eziwu-25, uGrade-3, 6 no-9 kuphela bese ngonyaka ozayo ibuya ngokusemthethweni kusona sonke isifundazwe i-ANA.

Utshele ILANGA ukuthi okusha ngalolu hlelo wukuthi sezizobhalwa emuva kweminyaka emithathu izivivinyo kanti eminyakeni edlule obekucasula othisha wukuthi kubhalwa unyaka nonyaka.

“Kuzoqokwa izikole ezimbalwa isifunda ngasinye. Empeleni lolu hlelo sesilubiza ngeSystematic Evaluation, ngoba sihlola ukuthi kuzohamba kanjani nokuthi ukhona yini umehluko ekufundiseni kothisha.

“Njengoba zonke izikole zizobe zibhala i-ANA ngoMandulo (September) ngonyaka ozayo, kuyoze kuphinde kubhalwe ngo-2022. Ngalesi sikhathi kusamiwe, kuzobhekwa ukuthi yiziphi izinkinga ezitholakele ekubhalweni kwalezi zivivinyo ezikhethekile nokuthi kulungiswa kanjani lokho,” kusho uMnu Mjoli.

Uthe lezi zivivinyo zizobe zigxile kwiMathematics nezifundo zolimi kuphela.

UNobhala weSouth African Democratic Teachers Union (Sadtu) KwaZulu-Natal, uNkz Nomarashiya Caluza, uthe sekwenzeka lokhu obekuyisiphakamiso sabo beyizinyunyana.

“Isidingo salolu hlelo besingasiboni kwaze kwaba sihlala phansi nazo zonke izinhlaka zezemfundo kwavunyelwana,” kusho uNkk Caluza.

Imizamo yokuthola uMengameli weNational Teachers Union (Natu), uMnu Allen Thompson, iphunzile njengoba ucingo lwakhe belukhala lungabanjwa ucingo lwakhe.