WALIWE WABULALA UMKHWEKAZI NENGODUSO
Ubesesola ukuthi iyamjolela
USHIYE isithombe esesabekayo endodaneni yakhe eneminyaka emithathu ubudala, unogada odubule wabulala ingoduso yakhe nomkhwekazi wakhe phambi kwayo ingane izolo ngeSonto eMagwaveni, oThongathi ngoba esola ingoduso ngokuthi imalile ngoba isiqomile.
Umsolwa okumanje ugcwele izinkalo, kuthiwa udubule uNkz Nombuso Dube (34) ( osesithombeni) nonina, uNkk Thokozile Dube (60), sebeguqile bemncenga ukuba angababulali, kodwa kuhlalwe phansi kuxoxwe inkinga yokwaliwa kwakhe.
UNkz Nonhlanhla Dube, oyindodakazi kaNkk Dube, obekhona ngesikhathi kwenzeka lesi sigameko, utshele ILANGA ukuthi unina ubefike ngoLwesihlanu esuka emakhaya eBhamshela, eyolungisa isimo phakathi kwalezi zithandani. Ubezophindela emakhaya namhlanje ngoMsombuluko njengoba esethola amachaphazelo.
Uthi kufike umsolwa izolo ekuseni besalele - sekuvuke unina kuphela - wacela ukukhuluma nengoduso yakhe nayo ebisalele.
“Babingelelane kahle nomama ngesikhathi efika, wacela ukuba amvusele udadewethu. Umama umngenise endlini, wabashiya bexoxa nodadewethu. Bengilele kwelinye ikamelo ngesikhathi ngizwa kunyuka amazwi, kuzwakala ukuthi bayaxabana.
"Ngizwe usbari ethi kudadewethu makamtshele into eyodwa, ukuthi usamthanda noma cha. Udadewethu uphendule ngokuthi akasamthandi kwabe sekuqhuma isibhamu,” kusho uNkz Dube.
Uthi unina ubekwelinye igumbi ngesikhathi kuqhuma isibhamu. Uphuthume kubona eyozama ukubalamula, wafica indodakazi yakhe incenga umsolwa ukuba bahlale phansi balungise inkinga yabo. Naye uNkk Dube ungene wancenga umsolwa ethi makehlise umoya, ahlale phansi nengoduso yakhe balungise inkinga yabo, abeke phansi isibhamu.
“Ngesikhathi umama emncenga u-sbari, ubonakale sengathi uyamlalela futhi uyayizwa into ayishoyo. Kudlule umzuzwana sezwa sekuqhuma isibhamu okwesibili, ngaleso sikhathi ubesedubula umama nodadewethu,” kusho uNkz Dube.
Uthi udadewabo ubenamasonto amathathu ehlala naye njengoba ubehlala nomsolwa emqashweni. Uthi ingxabano yabo iqale ngesikhathi umsolwa esola udadewabo ngokuthi kunowesilisa athandana naye, kwazise ubethi kunezinkulumo azibambe kumakhalekhukhwini wakhe, ezixoxa nesoka.
Utshele ILANGA ukuthi bakhulumile nodadewabo bembuza ngezinkulumo ezikumakhalekhukhwini, wabatshela ukuthi ngezowesilisa omeshelayo, kabathandani. “Thina besazi ukuthi sesingcono isimo phakathi kwabo njengoba efonile (umsolwa) ngoMgqibelo ntambama bakhuluma kahle ocingweni, waze wakhuluma nendodana yabo. Simangele uma sekwenzeka lokhu,” kusho yena.
Ngesikhathi ILANGA lifika kwaDube, amalungu omphakathi abegcwele egcekeni, ebabaza isihluku esenziwe ngumsolwa. Ikhansela lendawo, uNkz Zanele Khumalo - elizifikele mathupha endaweni yesigameko - lithe lisathukile namanje.
“Lo mfana ngiyamazi, ubejwayele nokungifonela uma kukhona izinto umphakathi okhala ngazo. Bekungumfana owukhathalele umphakathi futhi ehlonipha.
"Le nto ayenzile isethusile futhi kayifani nje naye,” kusho uNkz Khumalo. Okhulumela amaphoyisa KwaZulu-Natal, uCol Thembeka Mbhele, uthe kuvulwe amacala amabili okubulala, amaphoyisa athungatha umsolwa.