ISILO SIKHALE NGOKUFA EMATHAVENI
Sibonge nokwesekwa ngenkathi sisemanzini
SISOLE uhulumeni ngokuvumela amathaveni ukuba adayise utshwala, okugcina kufa kuwona abantu, iSilo uZwelithini kaBhekuzulu ngesikhathi sethula inkulumo eMkhosini weLembe, eMoses Mabhida Stadium, eThekwini izolo.
Lo mkhosi uvulwe ngenkonzo ngamaNazaretha ohlangothi lwaseBuhleni. ISilo besihambisana nondunankulu waso, iNkosi Mangosuthu Buthelezi, nguSihlalo weNdlu yobuHoli boMdabu KwaZulu-Natal, iNkosi Phathisizwe Chiliza, nguNgqongqoshe wezokuBusa ngokuBambisana nezoMdabu uMnu uZweli Mkhize, ongqongqoshe baKwaZulu-Natal, yizimeya, amakhansela namabutho.
Yethula iSilo iNkosi Buthelezi, isibongile ngokuhlanganisa uZulu kule nkundla enkulukazi yezemidlalo.
“Siyayibonga iNgonyama ngokusiqoqela ndawonye minyaka yonke ukuzokhumbula umsunguli wesizwe sakithi, iNgonyama uShaka kaSenzangakhona. Kulo nyaka kwenzeke inhlekelele ebingalindelekile, eholele ekuthathweni kwesinqumo esimqoka sokuba kuhlehliswe le migubho.
“Sisayizwa iminjunju yobuhlungu ekhungethe iSilo nendlunkulu ngokwedlula emhlabeni koMntwana uButholesizwe,” kusho iNkosi Buthelezi.
Sethula inkulumo iSilo, sithe: “Nginxusa uhulumeni ukuba wakhe ikhomishini kuphenywe wonke la matheveni ukuthi bangaki abantu asebefele kuwona naseduze kwawo. Sekuyisikhathi sokuthi sibe yimbumba manje, kangikhathali ukuthi ngabe uyiliphi iqembu lezepolitiki, kodwa ngithi thina njengoZulu masihlanganeni sibe yinto eyodwa.
“Masikuvikele okungokwethu, masingavumeli abantu basuke ezifundazweni zabo bezosibulalela okungokwethu njengoba bekwenzile kule nkundla ngemuva koku- hluleka ukwamukela imiphumela kudlalwa,” kusho iSilo siphawula ngesigameko lapho abalandeli beKaizer Chiefs belimaze khona impahla, bashisha nezihlalo zenkundla ngesikhathi ezabo zihlulwa yiFree State Stars ngo-2-0 kowandulela owamanqamu weNedbank Cup ngoMbasa (April) nonyaka.
“Usuku obekufanele ngizovala ngalo iminyaka ewu-200 kwabunjwa isizwe sikaZulu, bekunomkhuhlane endlunkulu, ngihanjelwe ngenye yamadodana ami.
“Ukufa kufikela noma ngubani. Kubuhlungu kunjalo, ngithi phephisani sizwe sikaZulu. Lokhu enikukhombise kimi njengenkosi yenu, nizwelana nami, ningiduduza ngomshophi ongehlele, ngiyabonga kakhulu.
“Isigameko sesibili yileso sabathile abebelola imikhonto befuna ukungephuca umhlaba. Ngifuna umengameli wezwe (uMnu Cyril Ramaphosa) eze la phambi kwesizwe asayine phansi athi ngeke alithinte izwe likaZulu.
“Okungidumaze kakhulu wukuthi abantu abebesibophela amanqina enyathi yilaba abakwethu, abakhona khona la. Vele umuntu oyisihluleki ebuholini ufuna ukuqeda ngendlu yakwabo. Kungani abantu uma behleli ematafuleni bephuza amatiye bafake negama lami?
Namanje ngisanithuma ngithi hambani niyothandaza ukuthi bonke laba ababhekene nami nani mayelana nezwe, uNkulunkulu makabenze baxabane bodwa,” kusho iSilo.
Umholi wamaNazaretha aseBuhleni, iNkosi Mduduzi “Nyazilwezulu” Shembe, uxoshise iSilo ngezi-nkomo; okuyizithole ezine, izinkabi ezimbili nenku
nzi.