I-PIRATES IBABAZA UKUZINIKELA KUKHUZWAYO
Ilinyalelwe ngomunye unozinti ibhekene noSuthu
UMQEQESHI we-Orlando Pirates, uMilutin “Micho” Sredojevic ubabaza ukuzinikela okukhonjiswa nguBrilliant “Casillas” Khuzwayo oseqalile ukujima ngokugcwele nale kilabhu alimale engakaze alidlubhe ijezi layo njengoba eyijoyine ngokuqala kwale sizini esuka kwiKaizer Chiefs.
Ekhuluma nabezindaba emuva kokuba iPirates ibambane namaZulu FC ngo-1-1 kowe-Absa Premiership ngoMgqibelo ebusuku eKing Zwelithini Stadium, eMlazi, uSredojevic uncome indlela abona uKhuzwayo elambele ngayo ijezi.
Lo mqeqeshi ukhulume ngoKhuzwayo nje, yingenxa yokuthi ezakhe ziyaxega ezintini njengoba kulimale uSiyabonga Mpontshane ngaphambi kokuqala kwalo mdlalo.
Lokhu kuholele ekutheni indawo yakhe ithathwe nguJackson Mabokgwane ovimbe kahle kakhulu kulo mdlalo. IPirates kayibange isaba naye unozinti wokuchibiyela ebhentshini.
USredojevic uthi indlela azikhandla ngayo ejimini uKhuzwayo, imnika ithemba lokumbona ezintini maduzane. “Ukubuya kukaCasillas kuzoyisiza kakhulu ikilabhu. Uyazimisela kakhulu ejimini, okuhle wukuthi bezwana kahle onozinti bami. Ngeke nangengozi ngimjahe ukumfaka. Ngifuna alulame kahle ngokugcwele. Okuhle wukuthi sizokuba nekhefu okumele silisebenzise ngendlela ezosisiza.
“Uma sisekhefini abaningi basuke becabanga ukuthi kuyaphunyulwa kanti cha. Sisuke sibheka kahle lapho sibuthaka khona sibuye sikhokhe nomoya ukubuya ngomkhulu umfutho,” kusho lo mqeqeshi odabuka eSerbia.
Ebuzwa uSredojevic ngesimo somgadli wakhe, uThamsanqa “Gandaganda” Gabuza, uthe ukholwa wukuthi uzosizwa yileli khefu ukubuyisa ifomu. Uthe noGabuza ukhombisa izimpawu zokulambela ijezi ejimini emuva kokuphazanyiswa yizinkinga ebezimhaqile. Kuzokhumbuleka ukuthi uGabuza uke waba sematheni eduba umdlalo uphakathi, waphumela ngaphandle.
Lo mqeqeshi ubuye waseka umgadli wakhe, uJustin Shonga waseZambia, okuphele umdlalo esehhewulwa ngabalandeli becasulwa wukuthi uhlulwe yinqwaba yamathuba okushaya amagoli.
“Inhloso yami enkulu wukuba ngubaba kubona bonke abadlali. Ngiyayiqonda ingcindezi ababhekana nayo enkundleni. Umsebenzi wakhe wokufaka ingcindezi ezitobheni uwenze kahle yize ebe namaphutha amancane. Muhle kakhulu ekuhlaleni ebhokisini,” kusho lo mqeqeshi.
Uthi okumele abalandeli bakuqonde wukuthi umsebenzi wabaqeqeshi wukuxazulula izinkinga ezisuke zihaqe abadlali. Uthi yingakho nendaba yokungafakwa kwiBafana Bafana kukaXolani “Ten-Ten” Mlambo ingamkhathazi. Uthi uyameseka umqeqeshi weBafana, uStuart Baxter ezinqumweni zakhe. Uthi okumqoka kuyena wukugqugquzela uMlambo ukuba aqhubeke nokudlala ngokuzimisela kumaBhakabhaka. Uthi okunye kuzozenzakalela.