KUQHUMA UMASIKANDI EMISAKAZWENI YASE-USA
BUVULA udedangendlale wenkundla yokucobelelana ngamasiko ubudlelwano bomsakazo womphakathi waKwaZulu-Natal, iNongoma FM nowaseButte, eMontana, e-United States of America (USA) njengoba abaphathi beNongoma FM, bekuleliya lizwe likaMnu Donald Trump ongumengameli, ngenhloso yokucosha ulwazi lokuthuthukisa umphakathi nabalaleli basezindaweni zasemakhaya.
UMnu Simonise Zulu, uMnu Welcome Ntombela noMnu Mokai Malope, bafulathele iNingizimu Afrika mhla ka-9 kuMandulo (September), ukuyofundisa ngamasiko ezizwe zaseNingizimu Afrika, okuyisenzo abahlose ngaso ukubeka iKwaNongoma ebalazweni lomhlaba futhi bacoshe nolwazi ngempilo yabantu bakuleliya lizwe.
UMnu Zulu ongumphathi wesiteshi, uthi kuningi okuhle abakufundayo njengoba beseButte. “Kuyintokozo kithi ukuqhuba ubudlelwano esibuqalile neKBMF ngoba njengamanje sekunemisakazo engaphezu kuka-7 esesakhe nayo ubudlelwano. Lokhu kuzosilekelela kakhulu ekufezeni inhloso yokuxhumanisa imiphakathi eyahlukene nokubafundisa ngamasiko ethu njengamaZulu.
“Sizoqala uhlelo lokuxhumanisa yonke imisakazo lapho sizobe sivakashelana, sithuthukisa kakhulu nabaculi bezindawo esizakhele. Ngonyaka ozayo sizothula iGlobal Radio Network Forum ezohlanganisa imisakazo yomphakathi evela emazweni ehlukene. Lolu hlelo luzoba yisigaba sesibili sengqophamlando ( documentary) esivele ikhona, ezokwethulwa ngonyaka ozayo uma isiphothuliwe,” kusho uMnu Zulu
Umsakazi womculo wesintu ophinde abe ngomunye wabaphathi kwiNongoma FM, uMnu Ntombela, uthe: “Sifika lapha e-USA, sisakaze uhlelo oluthi ‘Siyakhuleka Endlunkulu’ olungena ngo-12h00 kuya ku-13h:30 ngoLwesibili. Lolu hlelo luqukethe izindaba zeSilo, lwazisa nomphakathi ngemigubho nemicimbi yaso.
“Yilona esigadla ngalo phambili kulobu budlelwano bethu. Sesiphumelele nokufaka izingoma zamaciko akithi cishe emisakazweni ewu-5 lapha e-USA. Kula maciko kubalwa uMkhathazi, uMahosha, uKhuzani, uMthandeni (iGcokama Elisha) noMroza Fakude. Lokhu sikwenzela ukuba bazi izinto esiphila ngazo kwelengabadi.” kusho uMnu Ntombela. INongoma FM izibambele ezi-ndlekweni zalolu hambo ngokulekelelwa yiyonabelu iKBMF.