Lilale libaliwe iphoyisa ngelokubulala
Lidinwe umshayeli oshayise itekisi lalo
LILALE libaliwe iphoyisa laseSundumbili, eMandeni, elingusomatekisi, elisolwa ngokubulala umshayeli ngoba eshayise imoto yalo. Kubikwa ukuthi leli phoyisa likhalelwe ngamasongo kaSigonyela nozakwabo embonini yamatekisi ngoLwesine emuva kophenyo lwe-Independent Police Investigative Directorate (IPID).
Ngokuthola kweLANGA, umshayeli, uMnu Bheki Ntuli, ushaywe kanzima yileli phoyisa mhla ka-30 kuNcwaba (August), lihlangene nozakwabo abathathu, emuva kokuba itekisi abelishayela lishayise eyaleli phoyisa okubikwa ukuthi linamatekisi asebenzela eMandeni.
Kubikwa ukuthi phakathi kwabasolwa, kukhona nomnikazi wayo itekisi ebishayelwa nguMnu Ntuli. ILANGA lihabule ngemithombo yalo ekule ndawo ukuthi abasolwa bashiye uMnu Ntuli bethi ufile emuva kokumshaya kanzima.
Ilungu lomphakathi elicele ukungadalulwa ngoba lesaba ukuthi hleze nalo lisocongwe, lithi uMnu Ntuli ushone emuva kwezinsuku ezintathu eshayiwe.
Lithi bamshaye maqede bayomlahla emfuleni uThukela bezitshela ukuthi usendele koyisemkhulu. Ngokusho kwalo mthombo oyilungu lomphakathi, uMnu Ntuli uzihudulile waze wafinyelela emgwaqweni, okuyilapho emelwe khona yimoto emcoshile yayomshiya ngakwakhe.
“UNtuli ubengumuntu ozilungele, ngelanga ashaywe ngalo, itekisi abehamba ngalo lishayisane nelephoyisa elaziwayo lapha, elisebenza esiteshini samaphoyisa eSundumbili.
“Lifikile endaweni yesigameko labiza abanye osomatekisi elisebenzisana nabo, bathatha umufi bahamba naye. Bafike ndawana thize eyihlathi, bamshaya ngezagila maqede bamlayisha emotweni bayomlahla oThukela.
“Ngicabanga ukuthi uhlale izinsuku ezintathu kwakhe engayi esibhedlela ngenxa yokwesaba ukuthi hleze abasolwa bazobuye bayomqedela uma bethola ukuthi usaphila. Ngosuku lwesine zimxakile izinhlungu waphuthunyiswa emtholampilo. Baxakekile emtholampilo, bamdlulisela komunye omkhulu okuyilapho eshonele khona,” kusho ilungu lomphakathi.
Liqhuba lithi le nto iwucasule kakhulu umphakathi njengoba leli phoyisa lingumuntu ohlonishwayo endaweni futhi bekungacatshangwa ukuthi lingenza into enjena. Umthombo uthi kusize ukuba umsolwa ashone esewatshelile amaphoyisa abefike emtholampilo ukuthi ushaywe ngobani.
“Ngesikhathi intombi yakhe abehlala nayo imgeza nabanye omakhelwane, umzimba wonke ubuluhlaza, kubonakala ukuthi wophele ngaphakathi. Ngisho nengane ibibona ukuthi mancane amathuba okuthi angasinda lowaya muntu.
“Emtholampilo babize amaphoyisa ngoba bebona nabo ukuthi ulimele kakhulu, uwatshelile amagama abantu abamshayile,” kusho umthombo.
Okhulumela i-IPID, uMnu Moses Dlamini, ukuqinisekisile ukuboshwa kwephoyisa nabanye abasolwa abathathu ngecala lokubulala. Uthi bavelile eNkantolo yeMantshi KwaDukuza kanti basagcinwe ngaphakathi. Uthi kulindeleke ukuba baphinde bavele bayofaka isicelo sebheyili.
Bafike ndawana thize eyihlathi, bamshaya ngezagila...